سەرۆکی هاوپەیمانی دەوڵەتی یاسا پشتڕاستی دەکاتەوە کە ئەمریکا داوای هەڵوەشاندنەوەی حەشدی شەعبی و تێکەڵکردنیان بە هێزە ئەمنییەکان کردووە و ئاماژە بۆ داوایەکی دیکە ئەمریکاش دەکات ئەویش گواستنەوەی خەڵکی غەززەیە بۆ ئەنبار.
لە چەندین بۆنەدا بەرپرسانی عێراقی ئەوەیان نەشاردووەتەوە کە هەڕەشە لەسەر عێراق هەیە بەبۆنەی چالاکیی گرووپە چەکدارەکان و پشتیوانیکردنیان لە حەماس و حیزبوڵڵا و بە ئامانجگرتنی بە بەرژەوەندییەکانی ئەمریکا و ئیسرائیل لە ناوچەکە. لەسەر ئەو بنەمایەش چەند داوایەک بۆ هەڵوەشانەوە و کۆتاییهێنان بەو هێزانە خراوەتە بەردەم دەسەڵاتدارانی عێراق.
نووری مالیکی، سەرۆکی هاوپەیمانی دەوڵەتی یاسا ڕایگەیاند،"جێبەجێکردنی ئەم پلانە وڵات و دۆخی گشتیی دەخاتە بەردەم ناسەقامگیری"، ئاماژەی بەوەشکرد "ژمارەی ئەندامانی هێزەکانی حەشدی شەعبی گەیشتووەتە 260 هەزار چەکدار".
- هێزەکانی حەشدی شەعبی پێویستیان بە سەرلەنوێ پێداچوونەوە و پەیکەرەی نوێ هەیە بۆ ئەوەی ببنە دەزگایەکی سەربازی هاوشێوەی دەزگا ئەمنییەکان، هاوکات لەژێر فەرمانی فەرماندەی گشتی هێزە چەکدارەکانەوە بن.
- ڕەتکردنەوەی هەڵوەشاندنەوەی حەشدی شەعبی بڕیارێکی عێراقییە و هیچ لایەنێکی دەرەکی دەستوەردانی لەم بابەتەدا نەکردووە.
- ئەمریکا پێشنیاری دروستکردنی کۆمەڵگەی نیشتەجێبوونی لە ئەنبار بۆ خەڵکی غەززە کردووە، بەڵام ئەو بابەتە لەلایەن لایەنی عێراقی و فەلەستینییەوە ڕەتکراوەتەوە.
- چوارچێوەی هەماهەنگی لە قۆناغی داهاتوودا بەردەوام دەبێت، تەنانەت ئەگەر موقتەدا سەدر بگەڕێتەوە نێو پرۆسەی سیاسی، هەمیشە دەستم کراوەیە بۆی.
پێشتر هەریەک لە عهممار حهكیم، سهرۆكی ڕهوتی حیكمهی نیشتمانی و مەحموود مەشهەدانی، سەرۆکی ئەنجوومەنی نوێنەرانی عێراق ڕایانگەیاندبوو: سەرۆکی ئەمریکا، لەبارەی گرووپە چەکدارەکانەوە هۆشداریی بە سەرۆکوەزیرانی عێراق داوە.
وەڵام بدەوه