دەرماڵەی قوتابییان دابەش دەکرێت

ئەمڕۆ لە زانکۆیەک دوایین دەرماڵەی قوتابییان بۆ ساڵی 2022 دابەش دەکرێت و بەرپرسێکیش ئاشکرای دەکات، ڕەزامەندیی خەرجکردنی دەرماڵەی شەش مانگی ئەمساڵ وەرگیرا.

سەرمەند بەرزنجی، بەڕێوەبەری کارگێڕیی زانکۆی پۆلیتەکنیکی هەولێر،ڕایگەیاند: "پێشتر دەرماڵەی مانگەکانی 9 و 11 و 12 بۆ ساڵی 2022 دابەش کرابوو، تەنیا مانگی 10 مابوو لە ئەمڕۆوە دابەش بکرێت."

زانکۆی پۆلیتەکنیکی هەولێر، لە شەش کۆلێژ و شەش پەیمانگا پێکهاتووە، کە لەناو هەولێر و لە خەبات و کۆیە و چۆمان و مێرگەسوورن و ئێستا هەشت هەزار قوتابی تیایدا دەخوێنن.

سەرمەند بەرزنجی، ئاشکراشی کرد: " ئەنجوومەنی وەزیران رەزامەندیی داوە و داراییش ڕازامەندیی داوە لەسەر خەرجکردنی یەك ملیار و 981 ملیۆن و 572 هەزار دینار، کە بۆ شەش مانگ، واتا مانگەکانی 1بۆ، 6ـی 2023، ئەوەی ماوە تەمویل بدرێته بانکی زانکۆ و چەکەکان بدرێ و پارەکە خەرج دەکرێت."

بەڕێوەبەری کارگێڕیی زانکۆی پۆلیتەکنیکی هەولێر، ڕوونیشی کردەوە: "بەگشتی بۆ دەرماڵەی قوتابییانی زانکۆمان بۆ مانگەکانی (9، 10، 11، 12)ی 2023 بڕەکەی یەك ملیار و 39 ملیۆن و 416 هەزار دینار خەرج کراوە."

دەرماڵەی قوتابییانی ناوشار مانگانه‌ 40 هه‌زار دینارە و قوتابییانی ده‌ره‌وه‌ی شارەكانیش مانگانه‌ 60 هه‌زار دیناریان پێ ده‌درێت.

ئاشکراشی کرد، بۆ هەر 10مانگەکە سێ ملیار و 920 ملیۆن دینار خەرج کراوە، گوتیشی: "زیاتر لە چوار هەزار قوتابی له دەرماڵەکە سوودمەند دەبن، کە بەشێکیان زانکۆیان ئەمساڵ تەواو کرد، سەرەڕای قەیرانی دارایی و کێشەکان، بەڵام حکوومەت بەڵێنی خۆی بردووەتە سەر و دەرماڵەکە خەرج دەکرێ، ئەوەش مانای ئەوەیە کابینەی نۆیەم گرنگیی بە قوتابییان دەدات."

پێشتر د. کامەران یونس، سەرۆکی زانکۆی سەڵاحەدین ڕایگەیاند: "دەرماڵەی قوتابییان بڕیارەكەی لەلایەن مەسرور بارزانی، سەرۆكی حكوومەتی هەرێمی كوردستان، دەرچووە و پشتیوانییە بۆ قوتابییان، پارەکە تەنیا بۆ چەند مانگێك نییە."

ئەو گوتیشی: "مانگانە دەرماڵەی زانکۆکەمان 900، ملیۆون دیناری پێویستە، بۆیه کار دەکەین پارەکە دەستەبەر بکەین و لەگەڵ وەزارەتی دارایش قسەمان کردووە."

لەو بڕیارەی حكوومەتدا مانگانه‌ زیاتر له‌ 113 هه‌زار قوتابیی زانكۆ و په‌یمانگه‌كانی تەواوی هەرێمی كوردستان سوودمەند دەبن.

د. عه‌بدولفه‌تاح عه‌بدولڕە‌زاق، بریكاری وه‌زاره‌تی خوێندنی باڵا و توێژینه‌وه‌ی زانستی ڕایگەیاند: "بۆ ساڵی خوێندنی 2021- 2022 بڕی حەوت ملیار و 250 ملیۆن دینار دابین كرا، بۆ نۆژە‌نكردنه‌وه‌ی به‌شه‌ ناوخۆییه‌كان و دەرماڵەی قوتابییان و خوێندكاران، بۆ ساڵی خوێندنی 2022- 2023، بە رەزامەندیی سەرۆكی حكوومەتی هەرێمی كوردستان، هەمان بودجە تەرخان كرایەوە."