لەبارەی دووبارە خەرجكردنەوەی دەرماڵەی پیشەیی بۆ ژمێریاران و وردبینان، بەرپرسێكی سەندیكاكەیان روونكردنەوە دەدات و ئاشكرای دەكات، هەوڵ بۆ دووبارە گەڕاندنەوەی دەرماڵەكە دەدرێت.
گۆران فەرهاد، جێگری نەقیبی ژمێریاران و وردبینانی کوردستان، برایگەیاند: "دەرماڵەی ژمێریاران و وردبینان لە ساڵی 2007 خەرج كرا، دواتر لە ساڵی 2008 بە بڕیارێكی دارایی راگیرا، ئێستاش وەكوو ستافی تازەی سەندیكا و ئەنجووومەنی باڵا، هەموو هەوڵێكی خۆمان دەدەین، بۆ ئەوەی دەرماڵەكە بگەڕێتەوە."
ئاماژەی بەوەش دا: "ئەوەی داوا كراوە ئەوەیە، كە بەپێی چەند پلەبەندییەك دەرماڵەی مانگانە لەنێوان 50 بۆ 75 هەزار دینار بۆ فەرمانبەرانی بەشی ژمێریاری و وردبینیی دەزگاکانی حکوومەتی هەرێمی کوردستان خەرج بكرێت."
سەندیکا داوای كردووە، دەرماڵەكە بەم شێوەیە خەرج بکرێت:
* ئەندامان بڕی 75هەزار دینار مانگانە.
*دەستەی (ئەلیف) 60 هەزار دینار مانگانە.
*دەستەی (جیم) 50 هەزار دینار مانگانە.
نەقیبی ژمێریاران و وردبینانی ئاشكرای كرد: "دوای دەرچوونی یاسای ( پلەبەندی مووچە) ژمارە 22 و 23ی ساڵی 2008 بۆ فەرمانبەرانی حکوومەتی کوردستان، خەرجکردنی ئەم دەرماڵەیە راگیرا، ئێمە وەك سەندیکای ژمێریاران و وردبینان لە هەوڵەکانمان بەردەوام دەبین و هەموو ڕێگایەکی یاسایی دەگرینە بەر، بۆ گەڕاندنەوەی ئەو دەرماڵە و گشت شایستە داراییانەی، کە پەیوەستن بە ژمێریاران و وردبینان."
گۆران فەرهاد روونیشی كردەوە، زیاتر لە 16 هەزار ئەندامی راستەقینەیان هەیە، گوتیشی: "بەوردی نازانین چەندیان لە كەرتی تایبەت و چەندیان لە كەرتی حكوومیدان، بەڵام ئەگەر نیوەی ئەو ژمارەیە لە كەرتی حكوومیدا بن، مانگانە 600 ملیۆن دینار بۆ دەرماڵە پێویست دەبێت."
وەڵام بدەوه