سەرۆکی دەستەی وەبەرھێنان لە ھەرێمی کوردستان ڕایگەیاند، رێککەوتنی نێوان دامەزراوەی دارایی نێودەوڵەتی و دەستەی وەبەرھێنان کەوتووەتە بواری جێبەجێکردنەوە و بڕیارە بە سەرمایەی یەک ملیار دۆلار پاڵپشتیی وەبەرھێنان لە ھەرێمی کوردستان بکەن و بارەگایەکی خۆشیان بۆ ھاوکاریکردنی دەستەی وەبەرھێنان لە ھەولێر دەکەنەوە.
دکتۆر محەمەد شوکری، سەرۆکی دەستەی وەبەرھێنان لە ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی، بە سەرپەرشتیی سەرۆکی حکوومەتی ھەرێمی کوردستان رێککەوتننامەیەک بۆ جێبەجێکردنی پڕۆژەیەک لە نێوان دامەزراوەی دارایی نێودەوڵەتی و دەستەی وەبەرھێنان لە ماوەی ڕابردوودا واژۆ کرا و ئەو رێککەوتنەش لەگەڵ رێکخراوی (ئای ئێف سی) بۆ ماوەی چوار ساڵە، کە ئەم رێکخراوەش گرنگە بۆ تەمویلکردنی دارایی لە جیھان و سەر بە بانکی نێودەوڵەتییە و بارەگای سەرەکی لە بەغدایە، بڕیاریشە بارەگایەک لە ھەولێر بکەنەوە، ئەمەش بۆ دەستەی وەبەرھێنان گرنگە.
شوکری گوتیشی، ئەو دامەزراوەیە مەشق و راھێنان بە فەرمانبەران دەکەن و ھاوکار دەبن بۆ ژینگەی وەبەرھێنان لە ھەرێمی کوردستان و رێکخستنی وەبەرھێنان لەگەڵ دەرەوە، هەروەها ھاوکار دەبن بۆ راکێشانی وبەرھێنەران و تاوەکو یەک ملیار دۆلار ئەوان تەمویلی وەبەرھێنان دەکەن و پاڵپشت دەبن، بەڵام کۆمەڵێک مەرجی تایبەت بە خۆیان ھەیە، بۆیە ھیوادارین لە داھاتوودا بتوانین کاری باشتر بکەین و گرنگیی زیاتر بە کەرتی پیشەسازی بدرێت و یاسایەکی تایبەت بە پیشەسازی دابنرێت لە چوارچێوەی یاسای وەبەرھێنان و بتوانین بەشێک لە وڵاتان پاڵپشتیی دارایی وەبەرهێنەرانی هەرێمی کوردستان بکەن، بۆیە بەردەوام دەبین و ھیچ رێگرییەک نییە بۆ جێبەجێکردنی رێککەوتنەکە.
وەڵام بدەوه