بازرگانێک سەدان هەزار دۆلاری هاوڵاتیانی بردوو ڕای کرد

هەواڵی دووبارە قۆڵبڕین و فێڵكردن لە سنووری ئیداری راپەڕین بڵاو دەبێتەوە و باس لە بردنی سەتان هەزار دۆلار دەكرێت.

ئەمڕۆ پێنجشەم 26ـی كانوونی یەكەم، بەپێی ئەو زانیارییانەی "کوردستان پرێس" دەستی كەوتووە، چەند كەسێك بەناوی كۆمپانیایەك، سەتان كەسیان هەڵخەڵەتاندووە و بە سەتان هەزار دۆلاری هاووڵاتییانیان بردووە و رایان كردووە.

ئەوەش زانراوە ئەو كارە لە ژێر ناو كۆمپانیایەك بووە بەناوی (گ، و)، پارەیەكی زۆریان لە خەڵكی پشدەر و بەدیاریكراوی دەڤەری راپەڕین وەرگرتووە و گوتوویانە، لە وڵاتانی ئەوروپا و ئوسترالیا، سكۆتەرتان بۆ دەكڕین و بۆتانی بەكرێ دەدەین، بەڵام نە كۆمپانیا لە گۆڕێ بووە و نە سكۆتەر و نە هیچ شتێك، تەنیا پارە وەرگرتن بووە لە خەڵك.

ئەو كەسانەی پارەكانیان فەوتاوە لە "گ، و" ئەمڕۆ لە سۆشیال میدیا بڵاویان كردووەتەوە، كۆمپانیاكە داخراوە و ئەوەشی بۆ ساختەی ئەو كارە بەكار هاتووە، ڤیدیۆی دروستكراو بووە.

ئەو كارەش هەمان شتە لەگەڵ ئەوەی چەند ساڵێك پێش ئێستە لە سنوورەكە رووی دا، كاتێك سلێمان هەڵشۆیی و ناوێكی تریش بە ملیۆنان دۆلاری هاووڵاتییانیان برد.