بەفر بارین دەست پێدەکاتەوە

شارەزایەكی كەشناسی پێشبینی كاتی بەفر بارین لەناو شارەكان دەخاتەڕوو، هاوكات ڕایدەگەیەنێت، لە یەكەم ڕۆژی ساڵی نوێوە ڕەشەبا هەڵدەكات و لە ناوەڕاستی مانگی داهاتوودا شەپۆلی بەفر و باران دەستپێدەكاتەوە.

ئاراس جەبار، شارەزای كەشناسی ڕایگەیاند، کاریگەری شەپۆلەکەی شەوی ڕابردوو لەسەر ناوچەکانمان کۆتایی ھاتووە بەگشتی لەئەمڕۆوە تا نزیکەی 14 ڕۆژی داھاتوو عێراق و ھەرێمی کوردستان بەکەشێکی سەقامگیردا تێپەڕدەبێت.

ڕاشیگەیاند، لە ڕۆژی چوار شەممەی ئەم ھەفتەیەش 1/1/2025 بای باکوری ڕۆژھەڵات لەناوچەکانی پارێزگای سلێمانی و بەگشتی ناوچە شاخاوییەکانی ڕۆژھەڵاتی ھەرێم چالاک ئەبێت بەخێرای 15-30کم لە کاتژمێرێکدا و تا کۆتایی ھەفتە ڕۆژی ھەینی 3/1/2025 بەردەوامی ئەبێت و پلەکانی گەرماش بەدرێژایی 14 ڕۆژی داھاتوو زیاتر لە ئاستێکی جێگیردا ئەبێت و گۆڕانکاری ئەوتۆ ڕوونادات .

پێشبینی ئەوەشی كرد، “مانگی یەک-ی ساڵی داھاتوو لەنێوان مەودای 12/1/2025 بۆ 20/1/2025 ھەرێمی کوردستان و ناوچەکە بکەوێتە ژێر کاریگەری ھاتنی شەپۆلێکی جەمسەری بەھێزی سەرما و بەفر بارینەوە و بەفر لەسەنتەری شارەکان ببارێت”.