هەر بازرگانێک هەوڵی گرانی و قۆرخکاریی بدات سزادەدرێت

هۆگر عەلی، بەڕێوەبەری چاودێریی بازرگانیی هەولێر،  ڕایگەیاند: "بەهۆی هاتنی رێژەیەکی زۆری گەشتیار بە بۆنەی پشووی سەری ساڵ، چەند لێژنەیەک پێکهێنراون، بە مەبەستی گەڕان و پشکنین لە شاری هەولێر بۆ رێگریکردن لە گرانبوونی نرخی خۆراک و کاڵاکان."
ڕوونیشی کردەوە، لە پشووەکانی سەری ساڵدا خواست لەسەر خواردن و پێداویستییەکان زیاد دەبێت، بۆیە هەوڵی گرانی و قۆرخکاریی دەدرێت.
ئاماژەی بەوەش دا، سەردانی چەندین شوێن کراوە و بەردەوامیشین، گوتیشی: "بەردەوام لەناو شاری هەولێر دەگەڕێین و لە رۆژانی پشووشدا بەردەوام دەبین، بەهۆی سەرپێچیشەوە چەندین شوێنمان سزا داوە."
بەڕێوەبەری چاودێریی بازرگانیی هەولێر ئاشکراشی کرد: "ئەو شوێنانەی بەهۆی گرانفرۆشی سزا دەدرێن، سزاکانیان چەند جۆرێکە، سزای دارایی و داخستن بۆ 10 ڕۆژ، یانیش دەدرێنە دادگا."