لەبارەی لیستی مووچەی مانگی پێنج زانیاری هات

ئامادەکاریی لیستی مووچەی مانگی ئایار دەستی پێکردووە. بەرپرسێکی بایۆمەتریش ڕایدەگەیەنێت، سیستەمی (پەیرۆڵ) کارا نەکراوە و جەخت دەکاتەوە کارا دەکرێت و لە یەک دوو ڕۆژدا لیستەکە ئامادە دەبێت.

سەرچاوەیەک لە وەزارەتی دارایی و ئابووریی هەرێمی كوردستانەوە  ڕایگەیاند: "ئامادەکاریی خۆمان بۆ لیستی مووچە کردووە، بەڵام نەچووەتە نێو سیستەمی (پەیرۆڵ)."

سەرچاوەکەی دارایی گوتیشی: "هەوڵ هەیە لەم هەفتەیه لیستەکە لە گەنجینەکان ئامادە بکرێت و دواتر شاندێکی تەکنیکی وەزارەتی دارایی لیستی مووچە دەباتە بەغدا."

باسی لەوەش کرد، تەرازووی پێداچوونەوەی مووچەی مانگی چوار گەیشتووەتە دەستی دارایی فیدڕاڵ و مانگی پێشووش دوو ڕۆژ پێش ناردنی داهات تەرازووی پێداچوونەوە ڕەوانە کرا.

سەرچاوەکەی دارایی ئاشکرشی کرد، بڕیارە ئەمڕۆ لێژنەیەکی دارایی فیدڕاڵ بۆ پرسی مووچەی فەرمانبەران و خانەنشینان سەردانی دارایی هەرێمی کوردستان بکەن.

لای خۆیەوە یادگار جەبار، بەرپرسی بایۆمەتری لە سلێمانی،  ڕایگەیاند: "ئامادەکردنی لیستی مووچەی مانگی پێنج لە ڕێگەی سیستەمی (پەیرۆڵ) جارێ نەکراوە، چونکە سیستەمی (پەیرۆڵ) کارا نەبووە،"

ئاماژەی بەوەش دا، چاوەڕوانی بڕیاری ئەنجوومەنی وەزیران دەکەن بۆ کاراکردنی سیستەمەکە و چۆنیەتیی ئامادەکردنی لیستی مووچە بۆ مانگی پێنج، گوتیشی: "هیچ وەزارەت و فەرمانگەیەک ناتوانێ لیستەکە ئامادە بکات، کاتێ سیستەم ئەکتیڤ بوو، ئەوکات دەتوانن کار لەسەر لیستەکە بکەن."

بەرپرسی بایۆمەتری لە سلێمانی جەختی کردەوە، سیستەم ئەکتیڤ دەبێت و لیستی مووچە لە یەک دوو ڕۆژدا ئامادە دەکرێت.

لە هەرێمی کوردستان نزیکەی هەزار و 400 یەکەی ژمێریاری هەن و لە ڕێگەی سیستەمی (پەیرۆڵ) مووچەی مانگانەیان ئامادە دەبێت.