مژدەی خۆش بۆ ئەو فەرمانبەرانە هات

دابەشکردنی زەویی فەرمانبەران دەست پێدەکاتەوە و لە سنووری سەرۆکایەتیی شارەوانیی سێبیران هەزار فەرمانبەر و هێزە ئەمنییەکان و خانەنشینان زەوی وەردەگرن.
بەڕێوەبەری گشتیی شارەوانییەکانی هەولێر، دەڵێت: "تاوەکوو ئێستا لە سنووری ئێمه لە حەوت شارەوانی جیاواز زیاتر لە 15 هەزار پارچە زەوی دابەش کراوە."
مەریوان حاکم هادی، بەڕێوەبەری گشتیی شارەوانییەکانی هەولێر  ڕایگەیاند: "دوای تەواوبوونی ئامادەکارییەکان، ئەمڕۆ دابەشکردنی زەوی دەست پێدەکاتەوە و زەوی لە سنووری سەرۆکایەتیی شارەوانی سێبیران زەوی دابەش دەکرێت."
مەریوان حاکم هادی جەختی کردەوە، هەزار فەرمانبەر سوودمەند دەبن. گوتیشی: "فەرمانبەری شارستانی و سەربازی و خانەنشینانیش دەگریتەوە."
پێشتر لە سنووری بەڕێوەبەرایەتیی گشتیی شارەوانییەکانی هەولێر لە بەحرکە و قوشتەپە بە چەند وەجبەیەک زەوی دابەش کراوە.
بەڕێوەبەری گشتیی شارەوانییەکانی هەولێر، گوتیشی: "تاوەکوو ئێستا دوای بڕیارەکەی سەرۆکی حکوومەتی هەرێمی کوردستان، لە سنووری ئێمه، لە حەوت شارەوانی جیاواز زیاتر لە 15 هەزار پارچە زەوی دابەش کراوە و پڕۆسەکەش بەردەوام دەبێت."