لەبارەی تەمەنی خانەنشینی زانیاری هات

لەگەڵ ئەوەی پڕۆژەیاسای هەمواری تەمەنی خانەشینی بۆ زیادكردنی تەمەنی خانەنشینی لە 60 ساڵی بۆ 63 نزیك بوو دەربچێت، بەڵام ئەویش كێشەی تێكەوت. پەرلەمانتارێكی عێراق دەڵێت: "حكوومەت رازی نییە تەمەنەكە لە 60ەوە بكرێتەوە 63، لەبەر ئەوەی خەرجییەكانی زیاد دەكات."
د. نەرمین مەعرووف، ئەندامی لێژنەی دارایی پەرلەمانی عێراق ڕایگەیاند: "ڕەشنووسی هەمواری یاسای خانەنشینی خوێندنەوەی دووەمیشی بۆ كرا و لە دانیشتنی پەرلەمانیش داندرا، بەڵام دانیشتنەکە نەکرا."
لە سەرەتای مانگی 12ی ساڵی 2024، لێژنەی دارایی پەرلەمانی عێراق ڕایگەیاند: ”ڕەشنووسی هەمواركردنەوەی یاسای خانەنشینیی گشتی پێشكەش بە دەستەی سەرۆکایەتیی پەرلەمان کرد، بۆ ئەوەی خوێندنەوەی یەكەمی بۆ بکرێت.“
نەرمین مەعرووف ئاماژەی بەوەش دا: "بە فەرمی هیچیان نەگوتووە، بەڵام دەڵێن حكوومەت رازی نییە تەمەنەكە لە 60ەوە بكرێتەوە 63، لەبەر ئەوەی خەرجییەكان زیاد دەكات."
پێشتر تەمەنی خانەنشینی لە عێراق 63 ساڵ بوو، بەڵام یاساکە هەموار کرایەوە و کرایە 60 ساڵ، بە گوتەی نەرمین مەعرووف، لەسەر داوای دەستەی گشتیی خانەنشین، داوا كراوە تەمەنی خانەنشینی بکرێتەوە 63 ساڵ، بەڵام ئێستا كێشەی تێ كەوتووە.
تاوەكوو ساڵی رابردووش تەمەنی یاسایی خانەنشینی لە هەرێمی کوردستان 63 ساڵ بوو، بەڵام دواتر بە رێككەوتن، یاسای خانەنشینی یەكگرتوو لە هەرێمی کوردستان جێبەجێ كرا و خانەنشینی هاوتا كرا و بەهۆیەوە زیاتر لە 30 هەزار فەرمانبەر خانەشین كران.
ئەندامی لێژنەی دارایی پەرلەمانی عێراق جەختی كردەوە، ئەوان پشتیوانیی ئەوە دەكەن تەمەنی خانەنشینی بكرێتەوە 63 ساڵ، كە بەهۆی هەمواری یەكەمی یاساكە لە ساڵی 2019 تەمەنی خانەنشینی كراوەتە 60 ساڵ.
بەپێی یاسای خانەنشینی یەكگرتوو، وێرای ئەوەی فەرمانبەر لە تەمەنی 60 ساڵیدا بە زۆرەملێ خانەنشین دەكرێت، بەڵام پێویستە فەرمانبەر بۆ خانەنشینبوون یان 50 ساڵی تەمەنی تەواو کردبێت، یان راژەكەی لە 25 ساڵ کەمتر نەبێت.