مژدەی خۆش بۆ هاوڵاتیانی ئەو سنور هات

دوای سەری ساڵ پڕۆژەكانی حكوومەتی هەرێم بەچڕی دەست پێ دەكەنەوە، جووتسایدی حاجی ئۆمەران رێگەی هامڵتۆن- سۆران، جێبەجێ دەكرێت و ڕەزامەندیی لەسەر پڕۆژەی ڕێگەی نێوان ئاكرێ- شێخان دراوە.

 بە بڕیاری مەسروور بارزانی سەرۆكی حكوومەتی هەرێمی كوردستان، پڕۆژەی جووتسایدی حاجی ئۆمەران ڕێگەی هامڵتۆن- سۆران، لە ساڵی داهاتوودا دەچێتە بواری جێبەجێكردنەوە، هاوكات رێگەی نێوان ئاكرێ و شێخانیش تەواو دەكرێت.

ئەحمەد بارزان قایمقامی شارۆچكەی  چۆمان، بۆ "وشە" گوتی، دوای سەری ساڵ پڕۆژەكان بەرژدی دەست پێ دەكەنەوە، سەرەتاش لە سنووری چۆمان و سۆران قۆناغی دووەمی پڕۆژەی جووتسایدی حاجی ئۆمەران دەچێتە بواری جێبەجێكردنەوە.

كۆمپانیای "نۆڕز لایت" سەرپەرشتیی پڕۆژەكە دەكات. قۆناغی یەكەم لە دەروازەی حاجی ئۆمەرانەوە تا ڕەشدور دەبێت كە 15 كیلۆمەتر لە خۆی دەگرێت.

قایمقامی چۆمان دەڵێت، قۆناغی دووەم لە ڕەشدورەوە تا دەروازی شاری سۆران درێژ دەبێتەوە.

هاوكات ڕێگەی هامڵتۆن- سۆران دوای سەری ساڵ دەست پێ دەكات و دەچێتە بواری جێبەجێكردنەوە.

ڕێگەی هامڵتۆن یەكێك دەبێت لە پڕۆژە گرنگ و ستراتیجییەكانی حكوومەتی هەرێمی كوردستان بەتەواوكردنی، ڕێگەی حاجی ئۆمەران- سۆران ناوچەكە لە بواری بازرگانی و گەشتوگوزار و چەندان بابەتی تر دەبووژێتەوە.

پڕۆژەكە پێكدێت لە شەش ئۆڤەرپاس و نۆ ئەندەرپاس، هەروەها چەند تونێلێكی قەبارە بچووك و گەورە لەخۆ دەگرێت.

ئەوە لە كاتێكدایە بریكاری وەزارەتی ئاوەدانكردنەوە رای گەیاند، ڕەزامەندیی لەسەر پڕۆژەی ڕێگەی نێوان ئاكرێ- شێخان دراوە. پڕۆژەكە قۆناغی یەكەمی لە سەنتەری ئاكرێوە دەست پێ دەكات بۆ كۆمەڵگەی چڕە، قۆناغی دووەمیش لە چڕە بۆ شارۆچكەی شێخان.

بریكاری وەزارەتی ئاوەدانكردنەوە باسی لەوەش كرد، پێشتر سایدێكی ڕێگەكە دروست كراوە و سایدێك ماوە، بڕیارە ڕێگەكە بەشێوەیەكی سەردەمیانە و بە شێوازی ئەندازیاریی پێشكەوتوو دروست بكرێت.

د. ئاگرین عەبدوڵا گوتیشی، "ڕێگەكە ستراتیجی و نێودەوڵەتییە، ڕێگەكە دەچێتە ئیبراهیم خەلیل و هەرێمی كوردستان بە وڵاتی توركیا و وڵاتانی ترەوە دەبەستێتەوە.