ئەمڕۆ 22 ساڵ بەسەر كارەساتی یەكی شوبات تێپەڕ دەبێت

لە ڕۆژێكی وەك ئەمڕۆ یەكی شوباتی ساڵی 2004، لە كارەساتێكی گەورەدا زیاتر لە 103 كەس لە دوو تەقینەوەی تیرۆریستی لەناو لقی دووی پارتی دیموكراتی كوردستان و مەڵبەندی‌ سێی یەكێتی لە هەولێر شەهید بوون، تێیدا ژمارەیەكی زۆر لە سەركردە و كادری هەردوو حزب و دەیان پێشمەرگە و خەڵكی‌ سڤیل بوونە، قوربانی كردەیەكی تیرۆرستیی تیرۆریستان.

كردەوە تیرۆرستییەكە بە كارەساتترین ڕووداوی هەرێمی كوردستان لە قەڵەم دراوە كە لەلایەن ڕێكخراوی تیرۆریستی قاعیدە ئەنجام درا، لەناویاندا چەندان سەركردە و كادری هەردوو حزب و دەیان پێشمەرگە و خەڵكی‌ سڤیل بوونە قوربانی، هەروەها ژمارەیەكی زۆریش بریندار بوون.

پەلامارەكەی یەكی شوبات لە كاتێكدا بوو كە پارتی و یەكێتی پاش پرۆسەی ئازادی عێراق، پرۆسەی یەكگرتنەوەی هەردوو ئیدارەی هەرێمیان دەست پێ كردبوو و لاپەڕەیەكی نوێیان لە ڕێكخستنی پێوەندییەكانیان و چۆنیەتیی بەڕێوەبردنی حكوومەتی هەرێم و مامەڵەكردنیان لەگەڵ عێراقی نوێدا هەڵدابووەوە.

كارەساتەكە لە یەكەم ڕۆژی جەژنی قوربان و لە كاتی پێشوازیی میواناندا بوو، تیرۆریستان لە هەولێر دوو تەقینەوەیان لە یەك كاتدا ئەنجام دا. 

ساڵانەیش لەسەر گڵكۆی شەهیدان بەئامادەبوونی كەسوكاری شەهیدان و هاووڵاتییان، تاجەگوڵینە لەسەر گڵكۆی شەهیدان دادەنرێت و رێوڕەسمی تایبەت بەڕێوە دەچێت.