بەپێی نووسراوێکی وەزارەتی پەروەردەی حکوومەتی هەرێمی کوردستان، ئەو مامۆستایانەی کاتی خانەنشینییان هاتووە و وانەکانی پۆلی 12ی ئامادەیی دەڵێنەوە، جارێ خانەنشین ناکرێن و ماوەکەیان بۆ درێژ دەکرێتەوە، بریکاری وەزارەتی پەروەردەش دەڵێ، لە پێناو پرۆسەی خوێندن و تەواوکردنی پرۆگرامی خوێندندا ئەو بڕیارە دراوە.
بەپێی نووسراوێکی وەزارەتی پەروەردەی حکوومەتی هەرێمی کوردستان، کە واژۆی وەزیری پەروەردەی لەسەرە، ڕاگەیەندراوە: "ئاماژە بە فەرمانی ئەنجومەنی وەزیران بڕیارمان دا بە درێژکردنەوەی ماوەی خزمەت تا 1/7/2023 بۆ ئەو مامۆستایانەی وانەکانی پۆلی 12ی ئامادەیی دەڵێنەوە و وادەی خانەنشینبوونیان دەکەوێتە پێش ئەو رێککەوتە".
لای خۆشیەوە، بریکاری وەزارەتی پەروەردەی حکوومەتی هەرێمی کوردستان، دکتۆر سەیوان فەرەج، بۆ ماڵپەڕی فەرمیی پارتی دیموکراتی کوردستان گوتی: "بڕیارەکە لە بەرژەوەندیی پرۆسەی خوێندن و قوتابیان و تەواوکردنی پرۆگرام دراوە، لەبەر ئەوەی پۆلی 12ی ئامادەیی هەستیارە و پێویستە پرۆگرام تەواو بکەن، چونکە ئێستا ئەو مامۆستایانەی کاتی خانەنشینیشیان هاتووە، وانە دەڵێنەوە، بۆیە زۆر پێویستە کە ئەو بڕیارە دراوە و لە پێناو پرۆسەی خوێندن و قوتابیاندایە".
د. سەیوان گوتیشی، ئەو مامۆستایانە هەرچەند بن، بڕیارەکە دەیانگرێتەوە کە کاتی خانەنشینیان هاتووە و وانەکانی 12ی ئامادەیی دەڵێنەوە.
فەرەج باسی لەوەش کرد: "لەبارەی پڕکردنەوەی شوێنی ئەو مامۆستایانە دوای خانەنشینبوونیان، ئەوە ئەنجومەنی وەزیران بڕیاری لێ دەدات و ئێمە بە وانەبێژان بۆشاییەکان پڕ دەکەینەوە و گرفتی کەمیی مامۆستامان نییە
وەڵام بدەوه