لێزمە باران و بروسکەی بەهێز هەرێمی کوردستان دەگرێتەوە

محه‌مه‌د كه‌لاری، شاره‌زای كه‌شوهه‌وا رایگه‌یاند، "سبەی یەكشەممە 23/4/2023، بەھۆی ھاتنی بڕێك شێ و گەیشتنی نزمە پاڵەپەستۆیەك لە دەریای سوورەوە ئەگەری تاوەبارانی بەھاری ھەیە، لەگەڵ ڕوودانی ھەورەبروسكە و ھەندێك كاتیش تەرزەی لەگەڵ دەبێت."
ئاماژه‌ی به‌وه‌ش كردووه‌، سەرەتا لە ناوچەكانی سنووری پارێزگاكانی سلێمانی، كەركووك، ھەڵەبجە و ئیدارەی گەرمیان و پاشان ناوچە شاخاوییه‌كانی باكووری پارێزگای ھەولێر و ئیدارەكانی ڕانیە و سۆران، له‌گه‌ڵ بەشێك لە ناوچە سنووریەكانی باكووری پارێزگای دھۆك دەست پێ دەكات.
ئاشكراشی كردووه‌، درەنگانی شەوی یەكشەممە، بەھۆی ھاتنی شەپۆلێك لە دەریایی ناوەڕاسته‌وه‌ بۆ ناوچەكە، ئەگەری لێزمەباران زیاتر دەبێت و سەرەتاش لە سنووری پارێزگای دھۆك و باشووری پارێزگای موسڵ و پارێزگای ھەولێرەوە بەشێوەی تاوەبارانی بەھاری لەگەڵ برووسك و ھەندێك كاتیش تەرزە دەست پێ دەكات، پاشان لە كاتەكانی نیوەڕۆی ڕۆژیی دووشەمە بەدواوە ئەگەری ھەیە ھەموو كوردستان بگرێتەوە، واتا سەرتاسەریی دەبێت. بەڵام لە ھەندێك ناوچەی باشووری پارێزگای كەركووك و ئیدارەی گەرمیان، تەنیا بارانی ئاسایی یاخود نمەباران دەبێت. ئەم بارودۆخە تا نزیكی درەنگانی شەوی دووشەممە كاریگەری دەمێنێت و پاشان كۆتایی دێت، زۆرترین بڕی بارانبارینیش له‌ نێوان 30 - 40 ملم دەبێت.
ئه‌و كه‌شناسه‌ هۆشداریش ده‌داته‌ هاووڵاتیان، كه‌ ئەگەری ھەیە ئەم شەپۆلە ھەندێك كات ببێتە ھۆی لافاوی كتوپڕ لە ناوچه‌كانی چەم و دۆڵ و نزماییەكان. هاوكات ده‌ڵێ: "ئه‌م شەپۆلە ھەندێ كات، هه‌وره‌برووسكه‌ی به‌هێزی لەگەڵ دەبێت، بۆیە وا باشترە دوور بكەونەوە لە ستوونەكانی كارەبا و شوێنەبەرزەكان و دەشتایە بەرینەكان.