سەرچاوەکان ئاشکرایان کردووە، کە ئیسرائیل هەوڵ دەدات لە ڕێگەی هاتنە ناو خاکی سووریاوە، بەئاسانی دەستی بە عێراق و ئاسمانەكەی بگات، ئەوەش بۆ هێرشکردنە سەر ئامانجەکانیەتی لە عێراق.
ڕاپۆرتە عیبرییەکان جەخت لەوە دەکەنەوە، کە ئامانجی سوپای ئیسرائیل لەم قۆناغەدا، وێرانکردنی هێزی ئاسمانی و دەریایی و هەموو تانک و زرێپۆش و چەکە پێشکەوتووە ڕووسی و ئێرانییەکانە لە سووریا.
بەپێی زانیارییەكان، ئیسرائیل پێی وایە، بەبێ هەڕەشەی ئاسمانیی سووریا، هێزی ئاسمانیی ئیسرائیل دەتوانێت بەئاسانی بگاتە ئامانجەكانی لە عێراق.
لە راپۆرتێكدا، کە (ئەلعەرەبییە ئەلجەدید) بڵاوی كردووەتەوە، ئیسرائیل لەسەرەتای ڕووخانی ڕژێمی ئەسەدەوە، بەشێک لە چیای (شێخ حەرمۆن)ی كۆنتڕۆڵ کردووە، کە پێشتر لەژێر کۆنترۆڵی سوپای سووریادا بوو.
لەمبارەیەوە، بنیامین نەتانیاهۆ ڕایگەیاندووە، کە ڕێککەوتنی جیاکردنەوەی 1974 هەڵوەشاوەتەوە، وەک ئەوەی ڕێککەوتنەکە لەگەڵ بنەماڵەی ئەسەد بووبێت.
بەپێی میدیاكە، ئیسرائیل هەوڵ دەدات لە دۆخی ئاڵۆزیی سووریا کەڵک وەربگرێت، بۆ بەهێزکردنی پێگەی خۆی لە ناوچەکەدا و لاوازکردنی هەر دەوڵەتێکی داهاتووی سووریا.
هەروەها ئامانجی سەرەکیی ئیسرائیل لەو کردەوانەدا دڵنیابوونە لەوەی، کە سووریا ناتوانێت لەداهاتوودا هەڕەشە بۆ سەر ئاسایشیی ئیسرائیل دروست بکات، لەگەڵ کردنەوەی ڕێگە بۆ هەر هێرشێک، ئەگەر بیکاتە سەر ئامانجەکانی لە عێراق
وەڵام بدەوه