هۆکاری هاتنی بەپەلەی قائانی چی بوو بۆ بەغدا ؟

لە هەشتی ئەم مانگە ئێران دووچاری شكستێكی گەورە هاتەوە و دووەم پایەتەختی ناوچەكەی لەدەست دا، كاتێك لە دوای بەیرووت، چەكدارە توندڕۆ سوننەكان چوونە ناو دیمەشق و رووخانی رژێمی بەشار ئەسەدیان لە سووریا راگەیاند، چەند سەرچاوەیەكی عێراقی باسی ئەوەیان كرد كە چوارشەمی رابردوو فەرماندەی فەیلەقی قودسی ئێران گەیشتووەتە بەغدا و تەنیا چاوی بە فەرماندەی ژمارەیەك میلیشیای شیعە كەوتووە.

ئەگەرچی چەند سەرچاوەیەكی عێراقی رەتیان كردەوە كە ئیسماعیل قائانی، فەرماندەی فەیلەقی قودس سەرانی عێراقی كردبێت، بەڵام چەند سەرچاوەیەكی تر بە رۆژنامەی "عەرەبی ئەلجەدید"یان گوتووە، ئێواری چوارشەمی رابردوو قائانی گەیشتووەتە بەغدا و لەگەڵ فەرماندەی ژمارەیەك میلیشیای شیعە كۆبووەتەوە، باسی پەرەسەندنەكانی دۆخی سووریا و بۆردمان و پێشڕەوییەكانی ئیسرائیلیان كردووە. 

روونیان كردەوە، هەندێك لەو میلیشیایانە بەقائانیان گوتووە كە پابەندی هەڵوێستی عێراقن بە بێلایەنی بەرانبەر بەوەی لە سووریا دەگوزەرێت و نایانەوێ تێوەی بگلێن و بەرەی تری شەڕ بكەنەوە و چاوەڕوانی دۆخەكە دەكەن، نایانەوێ دۆخی تەناهیی عێراق تێك بچێت و پشێوییەكانی سووریا بێتە ناو عێراق و دۆخی سیاسی بەغدا بشێوێت، بەتایبەتی كە هەڵبژاردنی گشتی نزیك بووەتەوە. 

لەوكاتەی چەند سەرچاوەیەكی نزیك لە میلیشیا شیعەكان باسی ئەوە دەكەن كە هیچ بوونێكیان  لە سووریا نەماوە، عەلا مستەفا، شرۆڤەكاری سیاسی دووپاتی كردەوە كە ئەوەی لە سووریا رووی دا ویستێكی نێودەوڵەتی و ناوچەیی بوو و ئێران بەرەیەكی گرنگی بەرگریكاری لەدەست دا و رەنگە كار لە دۆخی عێراقیش بكات.

دووپاتی كردەوە، ئێران هەوڵ دەدات رێگری لەو دۆڕانانەی بگرێت و پارێزگاری لە پێوەندیی بەهێزی لەگەڵ بەغدا بكات، لەوكاتەی لای عێراق گرنگە پارێزگاری لە سنوورەكانی بكات، رۆڵی میلیشیاكانی لە سووریا كۆتایی هات و هیچ كاریگەرییەكیان نەما و هیچ خواستێكیان لە ناو سووریا بۆ داهاتوو نەما