سەرۆکی نوێنەرایەتیی حکوومەتی هەرێمی کوردستان لە بەغدا ڕایگەیاند، ئەگەری هەیە لە سەرەتای ئەم هەفتەیە وەزارەتی دارایی عێراق مووچەی مانگی 9ـی فەرمانبەرانی كوردستان بنێرێت.
ئەمڕۆ هەینی 28ی 11ـی 2025، فارس عیسا، سەرۆکی نوێنەرایەتیی حکوومەتی هەرێمی کوردستان لە بەغدا بە کوردستان24ـی ڕاگەیاند: "لەو باوەڕەم وەزارەتی دارایی عێراق ڕۆژی یەکشەممەی داهاتوو مووچەی مانگی 9ـی فەرمانبەرانی حکوومەتی هەرێمی کوردستان بنێریت."
ئاماژەی بەوەش دا، هەوڵی ئەوە دەدەن حکوومەتی عێراق مووچەی مانگەکانی داهاتووش بنێرێت.
سەرۆکی نوێنەرایەتیی حکوومەتی هەرێمی کوردستان لە بەغدا، ڕاشیگەیاند: "پێویست بوو حکوومەتی فیدراڵ ئەم هەفتەیە مووچەی فەرمانبەرانی هەرێمی کوردستانی ناردبایە، چونکە ئێمە هەموو پابەندییەکانی خۆمان جێبەجێ کردووە."
دووپاتیشی دەکاتەوە هەفتەی ڕابردوو 120 ملیار دینار داهاتی نانەوتی خراوەتە سەر هەژماری وەزارەتی دارایی لە بانکی ناوەندی.
وەڵام بدەوه