فڕۆکەکانی ئەمریکا لە ئاسمانی ناوچەکەن

فڕۆکەكانی تایبەت بە پڕكردنەوەی سووتەمەنی سوپای ئەمەریکا ئاسمانی ناوچەکەیان تەنیوە
ئەمڕۆ سێشەم سێی تشرینی دووەمی 2026، ماڵپەڕی "فلایت ڕادار 24"ی تایبەت بە چاودێریکردنی جووڵەی فڕۆکەوانی ئاشکرای کرد کە فڕۆکە سووتەمەنیبەخشەکانی سەربە سوپای ئەمەریکا، زۆرترین ڕێژەی چاودێریکردنیان لە ناوچەکەدا تۆمار کردووە، ئەمەش هاوکاتە لەگەڵ ڕاگەیاندنی هێرشێکی سنوورداری ئەمەریکا بۆ سەر بنکەیەکی بەرگریی ئاسمانیی ئێران لەلایەن دۆناڵد ترەمپەوە.
بەپێی ڕاپۆرتێکی ماڵپەڕەکە، فڕۆکەکانی تایبەت بە سووتەمەنیدان لە ئاسماندا کە سەربە هێزی ئاسمانیی ئەمەریکان، لە پێشەنگی ئەو گەشتانەدان کە لە ئێستەدا زۆرترین چاودێرییان دەکرێت. هاوکات بەکارهێنەرانی "فلایت ڕادار 24" بە وردی چاودێریی فڕۆکەکانی تری ناوچەکە دەکەن، بەتایبەتی ئەوانەی بەرەو ڕیاز دەچن یان لێیەوە دەگەڕێنەوە.
ئەم جووڵە چڕە ئاسمانییانە هاوکاتە لەگەڵ زیادبوونی ئەگەری دەستپێکردنەوەی جەنگ لەگەڵ ئێران. هەر ئەمڕۆ سێشەم، دۆناڵد ترەمپ سەرۆکی ئەمەریکا ڕای گەیاند کە وڵاتەکەی گورزێکی سەربازیی سنوورداری ئاراستەی دامەزراوەیەکی بەرگریی ئاسمانی لە ناوخۆی ئێران کردووە.
ئەم پێشهاتە خێرایانە لە کاتێکدان کە ئەمڕۆ سێشەم، هەڵبژاردنەکانی نیوەی خولی کۆنگرێسی ئەمەریکا دەستی پێ کردووە، ئیدارەی ترەمپیش لە ناوخۆی وڵاتەکەیدا ڕووبەڕووی فشاری زۆر بووەتەوە بەهۆی لێکەوتەکانی جەنگ لەگەڵ ئێران و تێچووە ئابوورییەکانی.
جێی باسە لە چەند هەفتەی ڕابردوودا، ترەمپ ئاماژەی بە ئەگەری دەستپێکردنەوەی هێرشەکان بۆ سەر ئێران لە دوای هەڵبژاردنەکانی کۆنگرێس دابوو، بەڵام دوێنێ دووشەم ئاماژەی بەوە کرد کە ڕەنگە بۆچوونی خۆی لەو بارەیەوە بگۆڕێت.