بەرێز مەسرور بارزانی بڕیاری دا

 مەسروور بارزانی بڕیاری دەستپێکردنەوەی هەناردەی نەوتی لە ڕێگەی بۆڕیی هەرێمی کوردستانەوە ڕاگەیاند سەرۆکی حكوومەت: گفتوگۆکانمان لەگەڵ بەغدا بۆ هەڵگرتنی ڕێگرییە بازرگانییەکان بەردەوام دەبێت
ئەمڕۆ سێشەم 17ی ئاداری 2026، مەسروور بارزانی سەرۆکی حكوومەتی هەرێمی کوردستان، لە پەیامێکدا ڕای گەیاند کە بە لەبەرچاوگرتنی ئەو بارودۆخە نائاساییەی ڕووبەڕووی وڵات بووەتەوە و ئەو بەرپرسیارێتییەی کە ئەرکی هەموومانە کار بکەین بۆ تێپەڕاندنی ئەم دۆخە سەختە، بڕیاریان داوە لە زووترین کاتدا ڕێگە بدەن نەوت لە ڕێگەی بۆڕیی هەرێمی کوردستانەوە بڕوات.
سەرۆکی حكوومەتی هەرێمی کوردستان لە پەیامەکەیدا دووپاتی کردەوە، هاوکات لەگەڵ حكوومەتی فیدراڵیش گفتوگۆکانیان بەردەوام دەبێت بۆ ئەوەی بەپەلە ئەو ڕێگرییانەی خراونەتە سەر هاوردە و جووڵەی بازرگانی لە هەرێمی کوردستان هەڵبگیرێن.
هەروەها ئاماژەی بەوەش دا کە کار دەکەن بۆ دابینکردنی گەرەنتی بۆ کۆمپانیاکانی نەوت و غاز، تا بتوانن بە سەلامەتی دەست بە بەرهەمهێنان بکەنەوە.
لە کۆتایی پەیامەکەیدا، مەسروور بارزانی سوپاس و پێزانینی خۆی ئاراستەی هاوبەشە ئەمەریکییەکان کرد بۆ ئەو ڕۆڵ و پاڵپشتییەی لەم پرۆسەیەدا هەیانبووە.