هاوتاکردنی مووچە لەگەڵ بەغدا جێگیردەکرێت

هەنگاوەکانی هاوتاکردنی مووچەی کەسوکاری شەهیدان، ئەنفالکراوان و زیندانیانی سیاسی لەگەڵ بەغدا تاوتوێ دەکرێن و وەزیرانی دارایی و كاروباری شەهیدانیش لە بودجە جێگیری دەكەن.
بەپێی راگەیاندراوێكی وەزارەتی دارایی و ئابووری هەرێمی كوردستان، ئەمڕۆ سێشەممە 18ی ئابی 2026، لە کۆبوونەوەیەکی گرنگی هاوبەشدا لە نێوان ئاوات شێخ جەناب، وەزیری دارایی و ئابووری و  عەبدوڵای حاجی مەحمود، وەزیری کاروباری شەهیدان و ئەنفالکراوان، كرا.
ئاماژە بەوە دراوە: "لە كۆبونەوەكەدا ڕێکارەکانی هاوتاکردنی مووچە و ئیمتیازاتی کەسوکاری شەهیدان، ئەنفالکراوان و زیندانیانی سیاسی لەگەڵ حکوومەتی فیدراڵ تاوتوێ کران، بە ئامانجی جێگیرکردنیان لە ڕەشنووسی بودجەی 2027."
ئەوەش خراوەت ڕوو، لەم دانیشتنەدا لێکتێگەیشتنێکی هاوبەش هەبوو لە نێوان هەردولا تاوەکو هاوشێوەی هاوتاکانیان لە بەغدا، تەواوی شایستە داراییەکانی ئەم توێژە لە بودجەی ساڵی 2027 دا دەستەبەر بکرێت.
وەزارەتی دارایی جەختی كردووەتەوە، ئامانج لەم هەنگاوانە، ڕێکخستنی شایستەکان و گەرەنتی کردنی مافە یاسایی و داراییەکانی ئەم توێژە تێکۆشەرەیە هاوشێوەی هاوتاکانیان لە حکوومەتی فیدراڵ.