بانکی ناوەندی قسەی کۆتایی کرد

بانکی ناوەندیی عێراق دەنگۆی هەوڵدان بۆ بەرزکردنەوەی بەهای دۆلار بەرامبەر بە دینار ڕەت دەکاتەوە و جەخت لە نەگۆڕانی سیاسەتی نەختینەیی دەکاتەوە.
بانکی ناوەندیی عێراق ڕایدەگەیێنێت، هیچ بڕیارێک بۆ بەرزکردنەوەی بەهای دۆلار بەرامبەر دیناری عێراقی لە ئارادا نییە و سەرجەم ئەو دەنگۆیانەی لەم بارەیەوە بڵاو کراونەتەوە، بە تەواوی دوورن لە ڕاستییەوە. لە ڕاگەیێنراوێکی فەرمیدا، بانکی ناوەندی ئاماژەی بەوە کردووە کە ئەو هەواڵانەی باس لە هەبوونی ئاراستەیەک بۆ بەرزکردنەوەی بەهای دۆلار بەرامبەر دینار دەکەن، بنەمایان نییە و تاوەکو ئێستا هیچ بڕیارێک بۆ گۆڕانکاری لەو بوارەدا نەدراوە. بەپێی ڕاگەیێنراوەکە، ئەو نرخەی ئێستا جێگیر کراوە هیچ گۆڕانکارییەکی تێدا نەکراوە. لەبەر ئەوە بانکی ناوەندی داوا لە سەرجەم دەزگاکانی ڕاگەیاندن دەکات کە لە گواستنەوەی ئەم بابەتەدا ورد بن و هەواڵی تایبەت بە سیاسەتی نەختینەیی و بەهای دۆلار تەنیا لە سەرچاوە فەرمییەکانەوە وەربگرن و بڵاوی بکەنەوە.بڵاوبوونەوەی ئەم ڕوونکردنەوەیەی بانکی ناوەندی لە کاتێکدایە کە هەواڵ و دەنگۆی جۆراوجۆر لەبارەی گۆڕانکاری لە بەهای دراوەکاندا بڵاو کراونەتەوە، ئەمەش وای کردووە بانکەکە بۆ ڕێگریکردن لە شێواندنی بازاڕ، هەڵوێستی فەرمیی خۆی ڕابگەیێنێت.