لێژنەیەكی لاوەكی بە مەبەستی چارەسەركردنی دۆسیەی مووچەی مووچەخۆرانی هەرێمی كوردستان لە یاسای بودجە پێكهێندراوە.
بەپێی هەواڵێكی ڕۆژنامەی (الصباح)ی فەرمیی عێراقی كە لە زاری جەمال كۆچەر، ئەندامی لێژنەی داراییەوە بڵاو كراوەتەوە، بە بڕیاری محەمەد شیاع سوودانی، سەرۆك وەزیرانی عێراق، لێژنەیەكی لاوەكی لە ژمارەیەك ئەندامی لێژنەی دارایی پەرلەمانی عێراق و ڕاوێژكارانی حكوومەتی فیدڕاڵی و حكوومەتی هەرێمی كوردستان پێكهێندراوە، لە پێناو چارەسەركردن و هەمواركردنی یاسای بودجە و چارەسەركردن و تێپەڕاندنی قەیرانی مووچەی مووچەخۆرانی هەرێمی كوردستان.
جەختیشی كردۆتەوە كە لێژنەكە كار لەسەر دوو دۆسیە دەكات، یەكەمیان پەیوەندی بە گواستنەوەی مووچەی فەرمانبەرانی هەرێمی كوردستانەوە هەیە لە دۆسیەی خەرجیی كرداری (نفقات فعلی)یەوە بۆ خەرجیی حاكیمە. دووەمیشیان پەیوەندی بە چارەسەركردنی كێشەی تێچووی بەرهەمهێنانی نەوت لە هەرێمی كوردستان هەیە.
ڕۆژنامەكە لە زاری ئەو پەرلەمانتارەوە باسی لەوە كردووە كە چەند پابەندییەك لەسەر هەردوو حكوومەت هەیە، لە حاڵەتی هەمواركردنەكەش، یاسای بودجەی ٢٠٢٣ هەموار دەكرێتەوە، لە حاڵەتی جێگیربوونی هەمواركردنەكەش، ڕاستەوخۆ لە بودجەی ساڵی ٢٠٢٤یشدا هەموارەكە جێگیر دەبێت.
لە كۆتاییشدا پێشبینیی ئەوەی كرد كە لە هەفتەی داهاتوو یان هەفتەی دواتر، لێژنەكە كۆبوونەوەی خۆیان لەمبارەیەوە بكەن.
وەڵام بدەوه