بەنزینی موحەسن و سوپەریش دادەبەزێت

وەزیری سامانە سروشتییەکان بە وەکالەت ڕایدەگەیەنێت، پرۆسەی دابەشکردنی بەنزینی نۆرماڵ بە نرخی 750 دینار بەردەوام دەبێت و ڕۆژانە حکومەتی هەرێمی کوردستان پاڵپشتیی سێ ملیۆن و 500 هەزار لیتر بەنزین دەکات بۆ دابەشکردن بەسەر سەرجەم ناوچەکانی هەرێمدا.
کەمال محەمەد، وەزیری سامانە سروشتییەکان بە وەکالەت لە لێدوانێکی ڕۆژنامەوانیدا ڕوونیکردەوە، دۆخی دابەشکردنی بەنزین بەرەو باشتربوون دەچێت و ڕۆژ لە دوای ڕۆژ پرۆسەکە خێراتر و باشتر دەبێت. ئاماژەی بەوەش کرد، پێشتر وەزارەتی نەوتی عێراق بڕی 50 هەزار بەرمیلی دابین دەکرد، بەڵام لە ئێستادا حکومەتی هەرێم خۆی پاڵپشتیی دابینکردنی هەمان بڕ دەکات، کە دەکاتە سێ ملیۆن و 500 هەزار لیتر بەنزینی نۆرماڵ لە ڕۆژێکدا.
سەبارەت بە جۆرەکانی دیکەی بەنزین، وەزیری سامانە سروشتییەکان ڕایگەیاند، بەنزینی جۆری سۆپەر و موحەسەن بازرگانین و حکومەت پاڵپشتیی نرخەکەیان ناکات، بەڵام لەم هەفتەیەوە بڕێکی باش لەو دوو جۆرەش هاوردە دەکرێت بۆ ئەوەی بخرێتە بازاڕەوە. جەختیشی کردەوە کە پاڵپشتیی حکومەت تەنها بۆ بەنزینی نۆرماڵە و پرۆسەی دابەشکردنی ئەو بڕە دیاریکراوە بەسەر سەرجەم پارێزگاکانی هەرێمدا بەردەوام دەبێت.