وەڵامێک و بەیاننامەیەک لە وەزیری بەرگریی ئەمەریكا بۆ گروپەکانی سەر بە ئێران لە عێراق

لۆید ئۆستین، وەزیری بەرگریی ئەمەریكا ڕایگەیاند، ڕۆژی دووشەممە سوپای ئەمریكا سێ بنكەی عێراقی بۆردومان كرد كە لەلایەن گرووپە چەكدارەكانی لایەنگری ئێرانەوە بەكاردەهێنرێن.
ئۆستین لە بەیاننامەیەكدا ڕایگەیاندووە، “هێزە چەكدارەكانی ئەمریكا هێرشی پێویست و ڕێژەیی بۆ سەر سێ دامەزراوەی عێراق دەستپێكرد كە لەلایەن كەتیبەكانی حزبوڵڵا بەكاردەهێنرێن.
ئاماژەی بەوەشكرد، ئەم هێرشە وەڵامێكە بۆ زنجیرەیەك هێرشی سەر تیمە ئەمریكییەكان لە عێراق و سوریا كە لەلایەن میلیشیاكانی سەر بە ئێرانەوە دەستیپێكردووە، لەنێویاندا ئەو هێرشەی كە دوێنێ كرایە سەر هێزەكانی ئەمریكا لە هەولێر.
لای خۆیەوە، ئادرین واتسۆن، وتەبێژی ئەنجومەنی ئاسایشی نیشتمانیی ئەمەریكا لە بەیاننامەیەكدا ئاماژەی بەوەكردووە، هێرشەكەی سەر بنكەی ئاسمانی هەولێر، بووەتە هۆی برینداربوونی سێ سەربازی ئەمریكی، كە باری تەندروستی یەكێكیان سەختە.