شەڕی ئیسرائیل و بزووتنەوەی حەماس و حزبوڵای لبنانی، كەرتی غەزە و باشووری بەیرووتی وێران كردووە، شەڕەكە لە ئێران نزیك دەبێتەوە، هاوكات بەهۆی میلیشیاكانەوە، رۆژانە هێرش دەكرێتە سەر دیمەشق و خەریكە لە دەرگەی عێراقیش دەدات، سەرۆك وەزیرانی عێراق دووپاتی دەكاتەوە كە بڕیاری شەڕ و ئاشتی بە دستی دەوڵەتە و بەرژەوەندیی عێراق و گەلەكەی لە سەرووی هەموو شتێكی ترەوەیە.
میلیشیاكانی عێراق، بەتایبەتی كەتیبەكانی حزبوڵا و سەید شوهەدا و بزاوی نوجەبا، رایان گەیاند كە پابەندی ئاگربەست لەگەڵ ئەمەریكا نابن، ئەوان دوور لە حكوومەتی عێراق ئەگەر دۆخەكە بخوازێت و ئیسرائیل هێرش بكاتە سەر ئێران، پەرە بە دۆخەكە دەدەن و هێرش دەكەنە سەر بنكەی سەربازی و بەرژەوەندییەكانی ئەمەریكا و كێڵگە نەوتییەكانی كەنداو، واتە عێراق دەبەنە ناو شەڕەكە و دەیكەنە گۆڕەپانێكی سەرەكی، كە ئەوەش عێراق بەرگەی ناگرێت و ئەو حكوومەتەی لەسەر شیعە حسێبە زەرەرمەندی یەكەمە.
ئەمڕۆ پێنجشەم محەمەد شیاع سوودانی، سەرۆك وەزیرانی و فەرماندەی گشتیی هێزە چەكدارەكانی عێراق لە دیدارێكی لەگەڵ كۆمەڵێك شێخ و پیاوماقووڵی پارێزگای واست رای گەیاند، بڕیاری شەڕ و ئاشتی لە لایەن دامەزراوە دەستوورییەكانی دەوڵەتی عێراقەوە بڕیاری لەسەر دەدرێت.
ئەو رووی كردە میلیشیاكان و دووپاتی كردەوە، هەركەسێك لەوە دەربچێت رووبەڕووی دەوڵەت دەبێتەوە كە پشت بە هێزی دەستوور و یاسا لە جێبەجێكردنی ئەركەكانی دەبەستێت، بۆیە بەرژەوەندیی عێراق و عێراقییەكان لە سەرووی هەموو شتێكەوەیە.
ئەو قسانەی سوودانی هاوكاتە لەگەڵ بەردەوامیی هێرشی بەشێك لە میلیشیا شیعە عێراقییەكان كە بەناوی بەرگریكاریی ئیسلامی و لە چوارچێوەی سیاسەتی یەكبەرەیی جەنگ لە دژی ئیسرائیل ئەنجامی دەدەن، كە تەواوی میلیشیاكانی ئێران لە ناوچەكە پێوەی پابەندن، كاتێك بە درۆن و مووشەك هێرش دەكەنە سەر ئامانجەكانی ئیسرائیلی.
وەڵام بدەوه