عێراق بەرەو سنورەکانی سوریا سەربازی جوڵاند

لە هەفتەی رابردووەوە چەند گرووپێكی بەرهەڵستكاری سووریا دەستیان بە هێرشێكی فرەوان بۆ سەر ناوچەكانی ژێر دەسەڵاتی حكوومەتی سووریا لە باكوری رۆئاوای ئەو وڵاتە كردووە، لە ماوەی چەند رۆژێكدا ناوچەیەكی فرەوانیان لە هەردوو پارێزگای ئیدلب و حەلەب گرت، لەناو پاشەكشەی سوپای سووریا، عێراق ترسی لێ نیشتووە و هێزی زیاتری بۆ سنوورەكانی سووریا رەوانە دەكات.

چەند رۆژێكە باسی ئەوە دەكرێت كە عێراق بۆ بەهێزكردنی ئاسایشی سنوورەكانی، هێزی زیاتری سەربازی رەوانەی سنوورەكانی سووریا كردووە، سەرچاوەیەكی تەناهیش باسی ئەوە دەكات فەرماندەیی هێزە چەكدارەكانی عێراق دوو لیوای رەوانەی سنوورەكانی سووریا لە شنگال كردووە، لیوای 101ی فرقەی زریپۆشی 25 و لیوایەكی سەر بە پۆلیسی فیدراڵی.

بەپێی سەرچاوەكە ئەوە یەكەمجارە لیوایەكی زریپۆش رەوانەی سنوورەكان دەكرێت، بەتایبەتی كە عێراق و سووریا سنوورێكی فرەوانیان لە پارێزگای نەینەوا هەیە، دەگاتە 264 كیلۆمەتر، بەڵام بەهۆی گرنگیی شارۆكەی شنگالەوە، ئەو هێزانەرەوانەی ئەوێ كراون، كە بڕیارە لە حاڵەتی نزیكبوونەوەی گرووپە چەكدارەكان ئەوان رووبەڕوویان ببنەوە.

دوێنێ سابت عەباسی، وەزیری بەرگریی عێراق خۆی سەردانی شارۆكەی شنگالی كرد و لەگەڵ فەرماندە سەربازییەكانی ناوچەكە كۆبووەوە و باسی مەترسیی رووداوەكانی سووریایان لەسەر عێراق كرد، كە ماوەی سێ رۆژە عێراق هێزەكانی لە سنووری سووریا زیاد دەكات، جیا لە چڕكردنەوەی هەوڵی هەواڵگری لە ئەگەری دزەكردنی چەكاران و هاتنی شەڕ بۆ ناو خاكی عێراق