عێراق بە دەست دەیان تەنگژەی قووڵەوە دەناڵێنێت

عێراق بە دەست دەیان تەنگژەی قووڵەوە دەناڵێنێت، گەورەترین تەنگژەكانی ئەوەیە لە سایەی بەردەوامیی گەندەڵی و خراپیی ئیدارەدان و لاگیری بۆ دەرەوە، ئیرادە و توانای چارەسەركردنی تەنگژەكانی نییە، بۆیە ئەو تەنگژانە كەڵەكە بوونە و تا دێت گەورەتر دەبن، سەرۆك وەزیرانی عێراق ددانی پێدا دەنێت كە لە رووی دارایی و بانكییەوە بەربەستیان لەپێشە.  

بەپێی بەیاننامەیەكی نووسینگەی محەمەد شیاع سوودانی سەرۆك وەزیرانی عێراق، لە میانی سەرپەرشتیكردنی كۆنگرەیەكی تایبەت بە چاكسازی لە كەرتی بانكیدا، ئەو دووپاتی كردووەتەوە كە وڵاتەكەی لە رووی دارایی و بانكییەوە رووبەڕووی بەربەست و ئاڵنگاری بووەتەوە.

سوودانی لە كۆنگرەكە باسی دەستكەوتەكانی كابینەی حكوومەتەكەی لە ساڵانی رابردوو كرد، ستایشی هەوڵەكانی بانكی ناوەندی و بانكەكان و تیمەكانی كاری كۆمپانیا راوێژكارییە ناوخۆیی و نێودەوڵەتییەكان كرد، كە هەوڵ بۆ پەرەپێدانی كەرتی دارایی و بانكی لە عێراق دەدەن، دووپاتی كردەوە كە حكوومەتەكەی لە دۆخێكی سەختی ئابووری دەستبەكار بوو كە پێویستیی بە وەرگرتنی چەند رێوشوێنێك بۆ گەیشتن بە سەقامگیری و پەرەپێدان دەكرد، بۆیە ئەو دەستكەوتانەی لە بوارەكانی دارایی و بانكی و ئابووری هاتنە كایەوە بووەنە هەنگاوی ئەرێنی بۆ چەسپاندنی بنەمای تۆكمە بۆ پەرەپێدان.

بەدرێژایی ماوەی دەسەڵاتی ئەو كابینەی حكوومەتی عێراق، چەندان تەنگژەی قووڵی دارایی و بانكی هەبوون، هەر لە بەرزبوونەوەی نرخی دۆلار لە بازاڕ و كاریگەرییەكانی تا حەواڵەی رەش و قاچاغی دۆلار بۆ بەرژەوەندیی وڵاتانی دراوسێ و سوودبینی بانكەكانی سەر بە میلیشیا و هێزە سیاسییەكان لە مەزادی بانكی ناوەندی بۆ دەستكەوتنی دۆلار بۆ چالاكییە سەربازییەكانیان و سپیكردنەوەی پارە.

لەبەرانبەردا بێتوانایی حكوومەت و بانكی ناوەندی لە رووبەڕووبوونەوەی ئەوانە، كە وای كرد چەندان بانكی تایبەتی ئیسلامی و بازرگانی بخرێنە لیستی سزاكانی ئەمەریكاوە، ئەوەش متمانەی بە كەرتی بانكی عێراق نەهێشت، لە رووی داراییشەوە عێراق خاوەنی یەكێكە لە گەورەترین بودجەكان لە ناوچەكە كەچی بودجەكەی پڕە لە كورتهێنان بەهۆی قەرز و سوودی قەرز و گەندەڵی لە پڕۆژە و دامەزراندنەوە.