پەیامێک لە حکوومەتی عێراق لەبارەی مووچە

لە هەنگاوێکی نوێدا بۆ یەکلاییکردنەوەی کێشە داراییە هەڵپەسێردراوەکانی نێوان هەولێر و بەغدا، ئەنجوومەنی وەزیرانی عێراق ئەمڕۆ سێشەم هەشتی تەمووزی 2025، پێکهێنانی لیژنەیەکی باڵای وەزاریی ڕاگەیاند. ئەرکی ئەم لیژنەیە بریتییە لە تاوتوێکردنی دوو "پێشنیازنامە"  کە یەکێکیان لەلایەن حكوومەتی فیدراڵی و ئەوی تریان لەلایەن حكوومەتی هەرێمی کوردستانەوە پێشکەش کراون، بەمەبەستی گەیشتن بە بڕیارێکی کۆتایی لەسەر دۆسیەی مووچە و داهاتەکان.

بەگوێرەی ڕاگەیەندراوێکی فەرمی کە لە نووسینگەی ڕاگەیاندنی محەمەد شیاع سوودانی، سەرۆک وەزیرانی عێراقەوە دەرچووە، ئەم هەنگاوە لە چوارچێوەی "پابەندبوونی حكوومەتە بە جێبەجێکردنی یاسای بودجەی گشتیی فیدراڵی و بڕیارەکانی دادگای فیدراڵی."

ڕاگەیەندراوەکە ئاشکرای کردووە کە ئەنجوومەنی وەزیران گفتوگۆی لەسەر دوو پێشنیازنامە کردووە کە تایبەت بوون بە میکانیزمی ڕادەستکردنی داهاتە نەوتی و نانەوتییەکانی هەرێم و دۆسیەی مووچەی فەرمانبەران و بەنیشتمانیکردنی (تەوتین).

لەسەر بنەمای ئەمە سەرۆک وەزیران ڕاستەوخۆ فەرمانی بە پێکهێنانی لیژنەیەکی باڵا کردووە بە سەرۆکایەتیی جێگری سەرۆک وەزیران و وەزیری پلاندانان و بە ئەندامێتیی وەزیرانی ئاوەدانکردنەوە و نیشتەجێکردن و خوێندنی باڵا، داد، و تەندروستی.

ئەرکی سەرەکیی لیژنەکە ئەوەیە کە لەگەڵ سەرجەم لایەنە پێوەندارەكان لە حكوومەتی فیدراڵی و حكوومەتی هەرێمدا گفتوگۆ لەسەر هەردوو پێشنیازنامەکە بکات و لە کۆتاییدا ڕاسپاردەکانی خۆی پێشکەش بە ئەنجوومەنی وەزیران بکات بۆ ئەوەی "لە نزیکترین کاتدا" بڕیاری گونجاوی لەبارەوە بدرێت.

پێکهێنانی ئەم لیژنە باڵایە دوای چەندین مانگ لە گرژیی سیاسی و فشاری دارایی دێت کە بەغدا لەسەر هەرێمی کوردستانی دروست کردبوو، بەتایبەتی لەرێگەی دواخستنی مووچەی فەرمانبەرانەوە.