شاندی ئێران نامێنێتەوە لە ئەمریکا

ئاژانسی تەسنیمی ئێرانی دەنگۆی مانەوەی شاندی وڵاتەکەی لە نیویۆرک بە مەبەستی دانوستان لەگەڵ ئەمریکا ڕەت دەکاتەوە و بڕیارە وەزیری دەرەوەی ئێران بگەڕێتەوە تاران. ئاژانسی تەسنیمی نزیک لە سوپای پاسدارانی ئێران، دەنگۆی مانەوەی شاندێکی تەکنیکیی وڵاتەکەی لە نیویۆرک بۆ ئەنجامدانی دانوستان لەگەڵ بەرپرسانی ئەمریکا بەدرۆ دەخاتەوە، و دووپاتی دەکاتەوە کە وەزیری دەرەوەی ئێران ڕاستەوخۆ ئەمریکا جێدەهێڵێت.
 ئاژانسە ئێرانییەکە لە نوێترین ڕاپۆرتیدا ڕایگەیاند: هیچ شاندێکی تەکنیکیی ئێران بە مەبەستی ئەنجامدانی دانوستان لەگەڵ ئەمریکا نەچووەتە نیویۆرک، و سەردانی شاندەکەی تاران تەنیا بۆ بەشداریکردن بووە لە کۆبوونەوەکانی کۆمەڵەی گشتیی نەتەوە یەکگرتووەکان.بەپێی زانیارییەکان، عەباس عێراقچی، وەزیری دەرەوەی ئێران و شاندە یاوەراکەی، دوای تەواوبوونی کارەکانیان لە نەتەوە یەکگرتووەکان، بڕیارە ڕۆژی سێشەممە ڕاستەوخۆ نیویۆرک جێبهێڵن و بگەڕێنەوە بۆ ئێران.