ئەمەریكا دەیەوێ باڵی ئێران لە ناو عێراق نەهێڵێت

لە ماوەی دوایی ئەمەریكا گوشارێكی رژدی لەسەر عێراق كردووە بۆ هەڵوەشاندنەوەی میلیشیاكان و رێكخستنەوەی حەشدی شەعبی، بە كورتی ئەمەریكا دەیەوێ باڵی ئێران لە ناو حەشدی شەعبی نەهێڵێت و ئەو هێزە تێكەڵ بە هێزە تەناهییەكانی عێراق ببێت، بۆیەش یەكەم هەنگاوی لە هەوڵدان بۆ پەكخستنی مووچەی حەشدی شەعبی دەست پێ كردووە.

عارف حەمامی پەرلەمانتاری شیعە ئەمەریكا بە هەوڵی پەكخستنی مووچەی ئەندامانی حەشدی شەعبی لە رێگەی گوشاری راستەوخۆ بۆ سەر كۆمپانیای پارەدانی ئەلیكترۆنی كی كارد، كە مووچەی حەشد دابەش دەكات، تۆمەتبار دەكات، روونی كردەوە، حەشدی شەعبی هێزێكی فەرمییە سەر بە دەوڵەتی عێراق و هەر هەوڵێك بۆ پەكخستنی مووچەی ئەندامانی كردنەئامانجی راستەوخۆی سەروەریی عێراقە. 

ئاشكرای كرد، ئەمەریكا گوشارێكی ئاشكرای كردووەتە سەر كۆمپانیای كی كار بە مەبەستی پەكخستنی خەرجكردنی مووچەی حەشدی شەعبی، ئەوەش لە چوارچێوەی چەند ئەجیندایەكی ناسراوی سیاسی لای رای گشتیی عێراق، ئێستەش پێویستە پڕۆژەیەكی سەربەخۆی دارایی لە عێراق هەبێت، بە هاوبەشی لە نێوان حكوومەت و وەزارەتی دارایی و بانكی ناوەندی بۆ مسۆگەركردنی مووچەی تەواوی فەرمانبەرانی دەوڵەت بێ ملكەچی بۆ گوشارەكانی دەرەكی. 

شایەنی باسە لە ماوەی دوایی مووچەی ئەندامانی حەشدی شەعبی زۆر دواكەوت، لە ناو بوونی راپۆرت بە بوونی گەندەڵییەكی گەورە لە دابەشكردنی مووچەی ئەوان و گومانیش لەوانەی مووچەكە وەردەگرن كە عێراقی نەبن، ئەوە وای كرد ئەمەریكا گوشار بكات و ئەگەری زۆرە كۆمپانیای كی كار بەو هۆیەوە سزا بدرێت.