سزا نوێیەکانی ئەمریکا بۆ سەر ئێران کاریگەری لەسەر عێراقیش دەبێت

ماڵپەڕی هەواڵی وزەی ئەمریکی (ئۆیل پرایس) لە ڕاپۆرتێکدا باسی لەو کاریگەرییە نەرێنییە ڕاستەوخۆ و ناڕاستەوخۆیانە کردووە کە کاریگەریی لەسەر عێراق دەبێت، لە ئەنجامی ئەو سزا ئابوورییە نوێیانەی کە ئەمریکا بەسەر ئێران و کۆمپانیاکان و کەسایەتی و کەشتییە نەوتهەڵگرەکاندا سەپاندوونی.

ماڵپەڕە ئەمریکییەکە نووسیویەتی: "لە کاتێکدا کە بەغدا بەدوای ڕێگەچارەی بەرزکردنەوەی ئاستی وەبەرهێنانی وزە و هاریکاری لەگەڵ کۆمپانیا نێودەوڵەتییەکانی نەوتدایە، ئەو سزایانە دەتوانن ڕێگری لە ڕەوتی وەبەرهێنان بکەن کە عێراق پێویستی پێیەتی، بەتایبەتی لە کەرتی وزە و غازدا."

هەروەها ڕاپۆرتەکە ئاماژەی بەوەش کردووە، ڕەنگە سزاکان کاردانەوەی بەرچاو و کاریگەری لەسەر عێراق هەبێت.

ماڵپەڕە ئەمریکییەکە ئەوەشی خستووەتە ڕوو: "لە چوارچێوەی سزاکانی ئیدارەی ترەمپ بەسەر ئێراندا، زیاتر لە 30 کەشتیی نەوتهەڵگر و قەوارە و کەسایەتیی کردە ئامانج، کە هەندێکیان پەیوەندیدارن بە عێراقەوە، ئەمەش دەتوانێت ڕێگری لەو وەبەرهێنانە نێودەوڵەتییە بکات کە عێراق پێویستی پێیەتی لە کەرتەکانی نەوت و غاز و بەندەرەکاندا، بەتایبەتی بەغدا بۆ بەڕێوەبردنی وێستگەکانی کارەبا پێویستی بە غازی سروشتیی زیاترە."

شیاوی باسە، وەزارەتی خەزێنەی ئەمریکا ڕۆژی پێنجشەممە ڕایگەیاند: "تۆڕە ئامانجدارەکان بە قەبارەی ملیاران دۆلار لە نەوتی ئێران دەجووڵێنن، سزاکانی واشنتۆن لیستی ئەو کۆمپانیایانە لەخۆ دەگرن کە پەیوەندییان بە سەلیم ئەحمەد سەعید، هاووڵاتیی بەریتانی- عێراقییەوە هەیە، کە تۆمەتبارە بە فرۆشتنی نەوتی ئێران کە بە (ساختە بە نەوتی عێراقی) ناودێر کردووە و لە ساڵی 2020وە دەستیان بەم کارە کردووە. هەروەها سزاکان چەند کۆمپانیایەکی عێراقیشی گرتەوە کە نەوتی ئێران لەگەڵ نەوتی عێراق تێکەڵ دەکەن و بە نەوتی عێراقی یان ئیماراتی دەیفرۆشنەوە.

ماڵپەڕە ئەمریکییەکە لە ڕاپۆرتەکەیدا باسی لەوەش کردووە: "هەرچەندە دەسەڵاتی ئێران بەسەر عێراقدا لاواز بووە، بەڵام هێشتا میلیشیا چەکدارەکانی سەر بە ئێران لەناو ئەو وڵاتەدا چالاکن."

دەشڵێت: "پێدەچێت سیاسەتی واشنتۆن عێراقیش بکاتە ئامانج وەک بەشێک لە ستراتیجی دوو ڕێڕەوی ترەمپ، کە بریتییە لە فشارخستنە سەر تاران بۆ گەڕانەوە بۆ دانوستانەکان و ڕاکێشانی عێراق بۆ خولگەی ڕۆژئاوا، ئەمەش بەغدا دەخاتە پێگەیەکی زۆر هەستیارەوە لە بەرامبەر ڕۆڵی پەرەسەندنی چین و ڕووسیا لە ناوچەکەدا."

هەروەها لە ڕاپۆرتەکەدا ئاماژە بەوە کراوە، ئەو سزایانەی واشنتۆن کە کەسایەتی و کۆمپانیاکانیا عێراقییەکانی کردووەتە ئامانج، پەیامێکی ناڕاستەوخۆی هۆشدارییە.

ڕوونیشی کردووەتەوە: "لە ڕوانگەی کۆمپانیا ڕۆژئاواییەکانەوە، ژینگەی وەبەرهێنان لە عێراقدا بووەتە ژینگەیەکی مەترسیدار، نەک تەنیا بەهۆی بارودۆخی ئەمنی و سیاسییەوە، بەڵکوو بەهۆی ئاڵۆزییە جیۆپۆلەتیکییەکان و سزا لاوەکییەکانیشەوە، ئەمەش دەتوانێت ڕەوتی وەبەرهێنانی وزە سنووردار بکات کە عێراق زۆر پێویستی پێیەتی، بەتایبەتی لە کەرتی وزە و غازدا کە بەدەست ژێرخانی لاواز و پشتبەستنی بە ئێرانەوە دەناڵێنێت، بۆ پڕکردنەوەی پێداویستییەکانی غاز و کارەبا."