ماڵپەڕی عالەم جەدید بڵاویکردەوە، سەرچاوە سیاسییە ئاگادارەکان لە ڕێکەوتی 29ی کانوونی دووەمی 2026 ئاشکرایان کردووە کە عەمار حەکیم، سەرۆکی ڕەوتی حیکمە، پەیامێکی ئەمریکای گەیاندووەتە لایەنە عێراقییەکان کە تێیدا واشینگتن بە توندی دژی کاندیدکردنی نوری مالکی وەستاوەتەوە و سێ ناوی جێگرەوەی پێشنیاز کردووە.
بەپێی زانیارییەکانی ئەو سەرچاوانە، واشینگتن ئارەزووی بینینی هەر یەکە لە مستەفا کازمی، حەیدەر عەبادی یان عەدنان زورفی دەکات لە پۆستی سەرۆک وەزیران، چونکە ئەو سێ کەسایەتییە بە دوور لە هەژموونی ئێران و میحوەرەکەی لە ناوچەکەدا دەبینرێن، ئەمەش بە واتای دوورخستنەوەی محەمەد شیاع سودانی دێت لە کێبڕکێی کاندیدکردنەوە.
سەرەڕای ناڕەزایەتییەکانی ئەمریکا، نوری مالکی هێشتا سوورە لەسەر وەرگرتنی پۆستی سەرۆک وەزیران و هەر جۆرە دەستوەردانێکی دەرەکی ڕەتدەکاتەوە، لە کاتێکدا چوارچێوەی هەماهەنگی بۆ دەربازبوون لەم قەیرانە بیر لە سیناریۆیەک دەکاتەوە کە مالکی ڕاسپێردرێت بەڵام لە پەرلەمان متمانەی پێنەدرێت بۆ ئەوەی بێ ئەوەی کاندیدبوونی بکێشێتەوە، پڕۆسەکە کۆتایی پێ بێت
دۆناڵد ترامپ، سەرۆکی ئەمریکا لە 27ی کانوونی دووەمی 2026 لە ڕێگەی پلاتفۆرمی "Truth Social" هۆشداری توندی دایە عێراق و ڕایگەیاند کە گەڕانەوەی مالکی دەبێتە هۆی بڕینی هاوکارییەکانی ئەمریکا، چونکە لە سەردەمی ئەودا وڵات تووشی هەژاری و پشێوی بووە، هەروەها جەختی کردەوە کە نابێت ڕێگە بە گەڕانەوەی ئەو دۆخە بدرێت
لە بەرامبەردا نوری مالکی لە ڕێکەوتی 28ی کانوونی دووەمی 2026 لە پۆستێکدا لە تۆڕی کۆمەڵایەتی "X" هێرشی کردە سەر هەڵوێستەکەی ترامپ و ڕایگەیاند کە ئەمە دەستوەردانێکی ڕاشکاوە لە کاروباری ناوخۆی عێراق و پێشێلکردنی سەروەری و دیموکراسی وڵاتەکەیە، ئاماژەی بەوەش کرد کە تا کۆتایی لەسەر کاندیدبوونی بەردەوام دەبێت.
هەر لەو چوارچێوەیەدا، مارکۆ ڕوبیۆ، وەزیری دەرەوەی ئەمریکا لە پەیوەندییەکی تەلەفۆنیدا لەگەڵ محەمەد شیاع سودانی لە 25ی کانوونی دووەمی 2026، جەختی لەوە کردووەتەوە کە هەر حکومەتێک لەژێر کۆنترۆڵی ئێراندا بێت ناتوانێت بەرژەوەندییەکانی عێراق بپارێزێت و پەیوەندییەکی هاوسەنگ لەگەڵ ئەمریکا بنیات بنێت
ململانێ ناوخۆییەکانی ناو چوارچێوەی هەماهەنگیش بەردەوامن، چونکە لە کاتی دیاریکردنی مالکی وەک کاندید لە 24ی کانوونی دووەمی 2026، هەریەکە لە قەیس خەزعەلی و عەمار حەکیم تێبینییان هەبووە، بە تایبەت حەکیم کە داوای سەرۆکایەتی چوارچێوەی هەماهەنگی و وەزارەتی نەوتی کردبوو، بەڵام لەلایەن مالکییەوە ڕەتکرابووەوە
ئێستا دیمەنە سیاسییەکە بۆ هەموو ئەگەرەکان کراوەیە و بەهۆی ئاڵۆزییەکان و دابەشبوونی دەنگەکان لەسەر کاندیدە جێگرەوەکانی وەک حەمید شاتری و باسم بەدری، ناتوانرێت بە وردی دیاری بکرێت کام ڕێڕەوی سیاسی لە عێراقدا سەرکەوتوو دەبێت.
وەڵام بدەوه