بڕیارە ئێوارەی ئەمڕۆ شەممە ٣١ـی ١ـی ٢٠٢٦، چوارچێوەی هەماهەنگی (کە هێزە سیاسییەکانی عەرەبی شیعە لەخۆ دەگرێت) کۆبوونەوەیەکی گرنگ و چارەنووسساز سەبارەت بە دۆسیەی سەرۆکایەتیی کۆمار و سەرۆکایەتیی ئەنجوومەنی وەزیران ئەنجام بدات.
سەرچاوەیەکی سیاسی بە ئاژانسی (شەفەق نیوز)ی ڕاگەیاندووە: "کە سەرکردەکانی چوارچێوەی هەماهەنگی لەم کۆبوونەوەیەدا تاوتوێی چەند پرسێکی یەکلاکەرەوە دەکەن کە پەیوەستن بە قۆناغی داهاتووی سیاسیی عێراق."
شایەنی باسە، ئەم کۆبوونەوەیە ڕێک لەو کاتەدا دێت کە هەموو چاوەکان لەسەر دانیشتنی سبەی یەکشەممەی ئەنجوومەنی نوێنەرانە، کە تایبەت کراوە بە هەڵبژاردنی سەرکۆمار.
بە گوێرەی زانیارییەکانی سەرچاوەکە، کۆبوونەوەکە لەسەر دوو كەیسی سەرەکی چڕ دەبێتەوە:
یەکەم: یەکخستنی هەڵوێست بۆ پۆستی سەرکۆمار
هەوڵی چوارچێوەی هەماهەنگی بۆ ئەوەیە هەڵوێستی لایەنەکانی ناو کوتلەکە یەک بخات بۆ پشتگیریکردن لە تەنیا یەک کاندید بۆ پۆستی سەرکۆمار، ئەمەش بە ئامانجی یەکلاکردنەوەی پڕۆسەی هەڵبژاردنەکە و دوورکەوتنەوە لە هەر پەرتەوازەیی و دابەشبوونێکی شیمانەیی لەناو گەورەترین کوتلەی سیاسیی وڵاتەکەدا.
دووەم: كەیسی سەرۆکایەتیی وەزیران و کاردانەوەی ئەمەریكا
تەوەرێکی دیکەی کۆبوونەوەکە تایبەتە بە کاندیدی سەرۆکایەتیی وەزیران، بەتایبەتی دوای ئەوەی دۆناڵد ترەمپ، سەرۆکی ویلایەتە یەکگرتووەکانی ئەمەریكا بە ڕاشکاوی ناڕەزایی بەرامبەر کاندیدکردنی نووری مالیکی بۆ ئەو پۆستە دەربڕیوە.
سەرچاوەکە ئاماژەی بەوەش کردووە: کۆبوونەوەکە باس لە دۆزینەوەی "چارەسەری سیاسی و دیپلۆماسی" دەکات بۆ تێپەڕاندنی ئەم تەنگژەیە، بە جۆرێک کە بەردەوامیی پڕۆسەی سیاسی لە چوارچێوەی تێگەیشتنی ناوخۆیی و نێودەوڵەتیدا مسۆگەر بکات.
هەروەها، چاوەڕوان دەکرێت کۆبوونەوەکە ڕاسپاردەی ڕوون دەربکات بۆ دیاریکردنی هەنگاوەکانی داهاتوو یان ئەگەر هەیە دەستکاریی "ستراتیژی کاندیدکردن" بکرێت بۆ ئەوەی لەگەڵ فشارە نێودەوڵەتی و ناوخۆییەکان بگونجێت.
وەڵام بدەوه