پەیامێکی گرنگ لە سەندیکای پارێزەران لە بارەی مووچەی فەرمانبەرانی ھەرێم

ئه‌مڕۆ سێشه‌ممه‌ 2ی 1ی 2024، سه‌ندیكای پارێزه‌رانی كوردستان، بەیاننامەیەکی بڵاو كرده‌وه‌ و تێیدا هاتووه‌، هەموو ساڵێک لە سێی کانونى دووەم، سەندیکاى پارێزەرانى کوردستان، بەبۆنەى دامەزراندنییەوە یاد و ڕێوره‌سم ساز دەکا و چالاکى جیاواز ئەنجام دەدات. ئەمساڵیش بەبۆنەى تێپەڕبوونى 31 ساڵ بەسەر دامەزراندنى سەندیکاى پارێزەرانى کوردستان، وێراى پیرۆزباییى لە خۆمان و گشت پارێزەرانى کوردستان، کە رۆژێکى پیرۆزە و پارێزەران شانازى بەو رۆژە دەکەن، کە مێژوویەکى پڕشنگدارى هەیە و پارێزەران لەو رۆژەدا سەربەخۆیانە و بوێرانە بڕیاریان دا نەچنەوە ژێربارى بڕیارى ناوەندیی رژێمى ئەوساى عێراق و ببنە خاوەنى سەندیکاى پارێزەرانى کوردستان، كە ئێستا بۆتە دەزگایەکى بەهێزى یاساییى لە کوردستان و عێراق و نزیکەى 20 هه‌زار پارێزەرى تێدا تۆمارە و کارەکانى بە شێوەیەکى یاساییانەى دەزگاییى بەڕێوە دەچێت و زیاتر لە 25 لق و ژوورى لە شار و شارۆچکەکانى کوردستان هەیە و پەیوەندییەکى تۆکمەى لەگەڵ دەسەڵاتەکانى یاسادانان، جێبەجێکردن و دادوەریى هەیە.
ئه‌وه‌ش خراوه‌ته‌ ڕوو، بەڵام بەهۆى ئەو دۆخەى کە کوردستان و عێراق پێى تێپەڕ دەبێت، بەتایبەت ئەو دۆخە ئابوورییەى کە حکوومەتى عێراقى بەسەر مووچەخۆرانى هەرێمى کوردستانى هێناوە و سێ مووچەى ساڵى 2023ى فەرمانبەران دابەش نەکراوە، کە بەرپرسیارییەتى سەرەکى لە ئەستۆى حکوومەتى عێراقدایە و داواکارین لە ساڵى 2024 گشت ئەو کێشانە چارەسەر بکات و مووچەى فەرمانبەرانى کوردستان بخاتە دەرەوەى گشت ململانێى و کێشە سیاسییەکان و نابێت بەهیچ شێوەیەک جیاوازى لەنێوان فەرمانبەرانى عێراق و کوردستان بکات و پێویستە بە تەواوى بەرپرسیارییەتى داراییى و ئەخلاقى لەو بارەیەوە لە ئەستۆ بگرێت و دەستوور جێبەجێ بکات و رێگە بەوە نەدات، بە بیانووى کەموکوڕى یاساى بودجە، مووچەخۆرانى هەرێمی كوردستان سزا بدرێن.
ئاماژه‌ به‌وه‌ش دراوه‌، ئەو هێرش و پەلاماردانە ناڕەواییانەى کە ماوەیەکە لەسەر هێزەکانى پێشمەرگە و فڕۆکەخانە و دەزگا فەرمییەکانى هەرێمى کوردستان هەیە بەهۆى درۆن و هێزە چەکدارە لە یاسا دەرچووەکان، بە توندى ئیدانە دەکەین و پشێوى و ئاڵۆزى لە هەرێم و عێراق دروست دەکات، کە پێویستە حکوومەتى عێراق و فەرماندەى هێزە چەکدارەکانى عێراق بە ئەرکى خۆى هەڵسێت و ئەو هێزە چەکدارییى و لایەنانەى لە پشتیەوەن سزا بدات و هیچ بوارێک بۆ پێشێلێکردنى سەروەرى هەرێم نەدرێت، کە پێشێلکردنى سەروەرى عێراقە و دەبێت بەدواداچوونى جددى بکرێت و تاوانباران بە توندترین شێوە سزا بدرێن و تاوانى لەو جۆرە دووبارە نەبێتەوە. بەپێچەوانەوە داهاتووى عێراق بە ئاقارێکى نادیار تێپەڕ دەبێت و پشێوى گەورە رووبەڕووى وڵاتەکە دەبێتەوە. هەر بۆیە سەندیکاى پارێزەرانى کوردستان بەپێویستى زانى ئەمساڵ هیچ مەراسیمێکى خۆشیى و ئاهەنگ و پێشوازیکردن لە میوانان و هەر جۆرە چالاکییەکى دیکە بەو بۆنەیەوە لە گشت لق و ژوورەکان و بارەگاى سەرەکى سەندیکاى پارێزەرانى کوردستان ئەنجام نەدات.
له‌ كۆتاییدا سه‌ندیكای پارێزه‌ران له‌و به‌یاننامه‌یاندا ئه‌وه‌شیان خستووه‌ته‌ ڕوو، بۆیە لە رێگاى ئەو بەیاننامەیەوە، دووبارە پیرۆزباییى خۆمان ئاڕاستەى گشت پارێزەرانى کوردستان و ئەندامانى سەندیکاکەمان دەکەین و هیوادارین لە ساڵى داهاتوو و لە سێى کانونی دووەم، بەشێوەیەکى فراوان ئەو یادە بەرز و پیرۆز ڕابگرین، خۆشییى و شادى پارێزەران هاوزەمان بێت لەگەڵ خۆشیى و شادى فەرمانبەرانى کوردستان و گشت چین و توێژەکانى دانیشتوى هەرێمى کوردستان و سەقامگیریى و تەناهیى و ئارامى سەرتاپاى هەرێمى کوردستان بگرێتەوە.