شارەزایەکی بواری کەشناسی ئاشکرای کرد کە سبەی ئاستی بەھێزیی شەپۆلی بەفروباران دەستپێدەکات و بارانێکی چڕ و زۆر لەناوچە شاخاوییەکانی پارێزگای هەولێر، دهۆک، سلێمانی، ھەڵەبجە و سنوری ئیدارەی راپەرین دەبارێت.
ئەمڕۆ هەینی 12/1/2024، ئاراس جەبار، شارەزای بواری کەشناسی بڵاوی کردەوە: "سبەی شەمە 13/1/2024، لەئەنجامی زیاتر ھاتنە خوارەوەی نزمەپاڵەپەستۆکەی باکوور کە بارستە ھەوایەکی ساردی لەگەڵدایە، وە زیادبوونی کاریگەری نزمەپاڵەپەستۆی دەریای ناوەراست قۆناغی چڕی شەپۆلی بەفروبارانبارین لەکاتەکانی بەیانییەوە ناوچەکانمان دەگرێتەوە و بەدرێژای کاتەکان بارانێکی چڕ و زۆر لەناوچە شاخاوییەکانی پارێزگای هەولێر، دهۆک، سلێمانی، ھەڵەبجە و سنوری ئیدارەی راپەرین دەبارێت و لە سەنتەری پارێزگاکانیش بارانێکی مامناوەند لەزۆربەی کاتەکانەدا دەبارێت و لە ناوچەکانی سنووری ئیدارەی گەرمیانیش ھەندێک کات بارانێکی کەم بۆ مامناوەند دەبارێت."
ئەوەشی خستووەتە روو: "پلەی گەرمی بەرێژەی 1 تا 2 پلەی دیکە بەراورد بە ئەمڕۆ نزمدەبێتەوە و خێرایی باش زۆربەی کاتەکان مامناوەند و چالاک دەبێت لە نێوان 10-25 کم لە کاتژمێرێکدا لە ئاراستەی باشوور و باشووری رۆژئاواوە."
ئاماژەشی بەوە داوە: "لەئەنجامی زیاتربوونی کاریگەریی بارستە ھەوای سارد سبەی لە ناوچە شاخاوییە بەرزەکاندا بەفرێکی چڕ دەستپێدەکات و ئەگەر ھەیە بەفر سەنتەری ئامێدی، بامەڕنێ و چۆمان بگرێتەوە، لەگەڵ بارینی بەفروباران بە تێکەڵی لە سەنتەری پێنجوێن، سیدەکان، مێرگەسۆر و چیای ئەزمەڕ."
راشیگەیاندووە: "ئەم قۆناغە بەھێزەی بەفروبارانبارین لەناوچەکانمان لە سبەی بەیانییەوە تاوەکوو بەرەبەیانی دوو سبەی رۆژی یەکشەممە 14/1/2024، بەردەوامی دەبێت و بۆ رۆژی یەکشەممەش کاریگەریی شەپۆلەکە تاوەکوو کاتەکانی ئێوارە بە بارانی مامناوەند و پچڕپچڕ بەردەوامی دەبێت و لە شەودا کۆتایی پێ دێت."
وەڵام بدەوه