شەپۆلێكی خۆڵبارین بەڕێوەیە

شارەزایەكی كەشناسی رای گەیاند، شەپۆلێكی خۆڵبارین بەڕێوەیە و هەینی لەسەر شەموو كاریگەرییەكەی بە تەواوەتی دەردەكەوێت.

ئەمڕۆ پێنجشەممە، هەڤاڵ گەڵۆزی شارەزای كەشناسی، راگەیاند، شەپۆلێكی خۆڵبارین بەرەو ناوچە جیاوازەكانی هەرێمی كوردستان و عێراق بەڕێوەیە. زیاتر گوتی، سبەی شەو هەینی لەسەر شەموو بەهۆی زیادبوونی خێرایی بای ڕۆژئاوا، لە هەندێ كاتدا دەگاتە 20 بۆ 40 كیلۆمەتر لە سەعاتێكدا، شەپۆلێكی خۆڵبارینی مامناوەند لە هەندێ ناوچە بۆ چڕ،  ڕوو لە سەرجەم ناوچەكانی باشوور و ناوەڕاستی عێراق دەكات.

باسی لەوەش كرد، كاریگەریی ئەو شەپۆلە خۆڵبارینە دەگاتە تەواوی ناوچە جیاوازەكانی هەرێمی كوردستان لە دهۆك، مووسڵ، كەركووك، گەرمیان، سلێمانی و هەڵەبجە، ڕاپەڕین، سۆران و زاخۆ دەبێت. ئەوە لە كاتێكدایە ماوەی دوو ڕۆژە، شەپۆلێكی پچڕپچڕی باران رووی لە هەرێمی كوردستان كردووە و بڕێكی زۆر باران باریوە.