کاتى باران بارین لە هەرێمى کوردستان ڕاگەیاندرا

ئەمڕۆ یەكشەممە 15/9/2024، ئاراس جەبار، شارەزای كەشناسی، لەبارەی یەكەم بارانی ئەمساڵ و كەشوهەوای ڕۆژانی داهاتوو ڕایگەیاندووە: "لە ماوەی رۆژانی ڕابردوودا شەپۆلێکی بەھێزی بارانبارین و نزمبوونەوەی پلەی گەرما بەشێکی زۆری وڵاتانی ئەورووپای گرتەوە، لە زنجیرە چیاکانی ئەلبیش یەکەم بەفری ئەمساڵ باری، لە سبەی دووشەممەوە 16/9/2024، کاریگەریی ئەو بارستەھەوایە بەسەر دەریای ناوەڕاستدا بۆ وڵاتانی شام و عێراق و ھەرێمی کوردستان درێژ دەبێتەوە، لە ئەنجامدا لە سبەیەوە تا کۆتایی ئەم ھەفتەیە، پلەی گەرما بە نزیکەی 3 تا 5 پلە بەراورد بە ڕۆژانی ڕابردوو، نزم دەبێتەوە و کەشی فێنک و پایزەیی دەست پێدەکات."
ئەوەشی خستووەتە ڕوو: "لە ئەنجامی کاریگەریی ئەو بارستەھەوایانە و بەردەوامیی نزمبوونەوەی پلەی گەرما، لە کۆتایی ئەم ھەفتەیە و بە دیاریكراوی ڕۆژی ھەینی 20/9/2024، لە ئەنجامی دروستبوونی نزمەپاڵەپەستۆیەک لەسەر دەریای ناوەڕاست، یەکەم بارانی پاییزەی ئەمساڵ ڕوو دەکاتە ناوچە جیاجیاکانی ھەرێمی کوردستان کە خۆی دەبینێتەوە لە نمەبارانی پچڕپچڕ، کاریگەرییەكەشی بۆ سەر ناوچەکانی پارێزگای دھۆک زیاتر دەبێت و لەو ناوچانەدا پێشبینیی بارینی بارانێکی ڕێژە مامناوەندیش دەکرێت."
ئەو شارەزایەی كەشناسی باسی لەوەش كردووە، کاریگەریی ئەم بارانە ماوەکەی کورتخایەن دەبێت و ڕۆژی شەممە 21/9/2024، کۆتایی دێت.