لە روژى دەنگدانی تایبەت پازدە پێشێلكاری لە هەڵەبجە تۆمار کراوون

رێكخراوی پەیامنێران بۆ ماف و گەشەپێدان، ئاشكرای كردووە، لەكاتی بەڕێوەچونی پرۆسەی دەنگدانی تایبەت، 19 پێشێلكاری بەرامبەر بە رۆژنامەنوسان تۆماركراون، كە 15 پێشێلكاریان لە پارێزگای هەڵەبجە بووە.
رێكخراوی پەیامنێران بۆ ماف و گەشەپێدان لەڕاگەیەندراوێكیدا ئاشكرای كردووە، رێكخراوەكەیان، لە رێگەی تۆڕی پەیامنێرانیەوە كە ژمارەیان (180) پەیامنێرە لە سەرتاسەری هەرێمی كوردستان، چاودێری بارودۆخی تیمەكانی راگەیاندنی كردووە و ئاماری پێشێڵكارییەكانی تۆماركردون.
بەپێی ئامارە راگەیەنراوەكەی رێكخراوەكە لە كۆی 19 پێشێلكاری تۆمار كراو 15 پێشێلكاری لەبەرامبەر رۆژنامەنووسان لە پارێزگای هەڵەبجە بووە.
دوێنێ 18ی ئۆكتۆبەری 2024، پرۆسەی دەنگدانی تایبەتی هەڵبژاردنەكانی خولی شەشەمی پەرلەمانی كوردستان لە ناوەوە و دەرەوەی پارێزگاكانی هەرێمی كوردستان بەڕێوەچوو، كە تیایدا  لە كۆی 215 هەزار و 960 دەنگدەر، 208 هەزار و 521 دەنگدەر بەشداریان لە دەنگدانی تایبەتدا كردووە.