ئەو زەویانەی دابەشکراون بەسەر فەرمانبەران نرخەکەیان فڕی

دابەشكردنی زەوی بەردەوامە بەسەر فەرمانبەران، ئێستە بەشێكیان وەری دەگرن و بەشێكیان ناویان تۆمار كراوە لە پرۆسەكە، شارەزایان و خاوەن نووسینگەكانی خانووبەرە دەڵێن، نرخی دەگاتە نزیكەی 10 هەزار دۆلار.

ئەمڕۆ دووشەم 11ـی تشرینی دووەم، سەردار ئازاد خاوەنی نووسینگەی خانووبەرە،  رایگەیاند، ئەو زەوییانەی لە هەولێر بەسەر فەرمانبەران دابەش كراوە، شوێنێكی زۆرباشە و داهاتوویەكی باشیشی دەبێت.

زیاتر گوتی، نرخی ئەو زەوییانە ئێستە بەپێی نزیكترین شوێن دیاری دەكرێت، بۆیە نزیكترین شوێن لەو زەوییانە گەزنەیە، زەویش لە گەزنە لە سەرووی 25 هەزار دۆلارییە واتا دوو دەفتەر و نیو.

روونی كردەوە، ئێستە ئەو زەوییانە تاپۆ نەكراون لە سەرووی پێنج هەزار دۆلار نرخیان هەیە، ئەگەر تاپۆ بكرێن و خزمەتگوزارییان بۆ بچێت، ئەوا نرخەكەیان زۆر زیاد دەبێت.

هاوكات شوان محەمەد خاوەنی نووسینگەی كڕین و فرۆشتن لە سنووری گەزنە،  رایگەیاند، هەر فەرمانبەرێك ئەو زەوییەی وەرگرتووە هیوادارم نەیفرۆشێت، چونكە داهاتوویەكی باش دەبێت و لە باشترین زەوییەكان دابەش كراون.

روونی كردەوە، هەر فەرمانبەرێك كارتی زەوییەكەی وەرگرتبێتەوە، ئێستە دەتوانێت بیفرۆشێت كە سەرووی حەوت هەزار دۆلار دەكات.

دابەشكردنی زەوی لەلایەن حكوومەتی هەرێمی كوردستان ماوەی سێ‌ هەفتەیە بە تەواوەتی دەستی پێ‌ كردووە، بڕیاریشە هەرچی فەرمانبەرە مافی وەرگرتنی زەوی هەیە پێی بدرێت.