کاتی گەیشتنی مووچەی مانگی دە ڕاگەیاندرا

چاوەڕێ دەكرێت سبەی پێنجشەم یان رۆژی یەكشەم، بەغدا پارەی مووچەی فەرمانبەرانی كوردستان بنێرێت، رێباز حەملانیش دەڵیت، هەموو ئەو دەنگۆیانەی لەبارەی لیستی مووچەوە هەن دوورن لە راستییەوە.

ئەمڕۆ چوارشەم 13ی تشرینی دووەم ڕێباز حەملان رای گەیاند، هەموو ئەو دەنگۆیانەی لەبارەی كێشە لیستی مووچەخۆرانی هەرێمی كوردستانەوە هەن، دوورن لە راستییەوە و  لیستەكان بێ كێشەن.

هاوكات ئەوەشی گوت، چاوەڕێین سبەی پێنجشەم یان رۆژی یەكشەمی هەفتەی داهاتوو، بەغدا پارەی مووچەی مانگی 10ی فەرمانبەرانی كوردستان بنێرێت.

لە درێژەی لێدوانەكەیدا رێباز حەملان باسی لەوە كردووە، هەندێك تێبینی هەبوون لەسەر لیستەكان، بەڵام روونكردنەوەیان پێ دراوە و وردبینیشیان تەواو كراوە و چاوەڕێین بەزووترین كات پارەی پێویست بنێرن.

راوێژكارەكەی سەرۆكی حكوومەت ئەوەشی گوت، لەگەڵ ئەوەشدا بەغدا چاوەڕوانە هەرێمی كوردستان داهاتی نانەوتی بخاتە سەر هەژماری حكوومەتی عێراق، ئەمڕۆ چوارشەم یان سبەی پێنجشەم داهاتەكە دەنێرین.

ئەوەی پێویستە بیزانیت: بەگوتەی  ڕێباز حەملان، سبەی پێنجشەم 14ی مانگ یان یەكشەمی داهاتوو كە دەكاتە 17ی مانگ، وەزارەتی دارایی عێراق گوژمەی یەكەمی مووچەی مانگی 10 دەخاتە سەر هەژماری وەزارەتی دارایی و ئابووریی هەرێمی كوردستان.