بە مەبەستی بەشداریكردنی لە پێنجەمین كۆڕبەندیی ئاشتی و ئاسایشی ڕۆژهەڵاتی ناوەڕاست (مێپس 2024) لەزانكۆی ئەمریكی - كوردستان لە شاری دهۆك، ئەحمەد داوودئۆغلوو گەیشتە هەولێر و بڕیارە سبەش بچێتە دهۆك.
ئێوارەی ئەمڕۆ پێنجشەممە 21ی 11ی 2024، پارێزگای هەولێر ڕایگەیاند: "ڕێبەر ئەحمەد، وەزیری ناوخۆ و سەفین دزەیی، بەرپرسی فەرمانگەی پەیوەندییەکانی دەرەوەی حکوومەتی هەرێم و ئومێد خۆشناو، پارێزگاری هەولێر و ئێرمان تۆبجو، کونسوڵی گشتیی تورکیا لە هەولێر لە فڕۆکەخانەی نێودەوڵەتیی هەولێر، پێشوازیان لە ئەحمەد داوودئۆغلوو، سیاسەتمەدار و سەرۆکی پارتی ئایندە و سەرۆکوەزیرانی پێشووتری تورکیا و شاندێکی یاوەری كرد، کە پێکهاتبوو لە ژمارەیەک پەرلەمانتاری تورکیا."
پارێزگای هەولێر ئاماژەی بەوەش داوە، كە هاتنی ئەحمەد داوودئۆغلوو و شاندی هاوڕێی، بەمەبەستی بەشداریكردنە "لە پێنجەمین کۆڕبەندیی ئاشتی و ئاسایشی ڕۆژهەڵاتی ناوەڕاست (مێپس 2024) لە زانکۆی ئەمریکی – کوردستان لە شاری دهۆک."
ڕوونیشی كردووەتەوە، كە "بەیانی ڕۆژی هەیینی، 22ی 11ی 2024، پێنجەمین کۆڕبەندیی ئاشتی و ئاسایشی ڕۆژهەڵاتی ناوەڕاست (مێپس 2024) لە زانکۆی ئەمریکی – کوردستان لە شاری دهۆک دەست پێدەکات و تاوەکوو ڕۆژی یەکشەممە، 24ی 11ی 2024، بە بەشداری نزیکەی 124 کەسایەتیی سیاسی و ئەکادیمیست لە 40 وڵاتی جیاوازەوە بەردەوام دەبێت."
وەڵام بدەوه