سبەی پارەی ئەو توێژە دابەشدەکرێت

بڕیارە لەم هەفتەیە پارەی گەنمی جووتیاران دابەش بكرێت، بڕەكەشی 158 ملیار دینارە و سەرجەم ئامادەكارییەكان دەستی پێ‌ كردووە، ئەگەری هەیە سبەی یان سێشەم پارەكە بۆ جووتیاران خەرج بكرێت.

ئەمڕۆ یەكشەم 24ـی تشرینی دووەم، حەمەزیاد سەعید ئەندامی كۆمەڵەی جووتیارانی كوردستان،  رایگەیاند، دوای هەوڵی بەرپرسانی حكوومەتی هەرێمی كوردستان، خۆشبەختانە بڕیاری خەرجكردنی بڕی 158 ملیار دینار جووتیاران دەرچوو.

زیاتر گوتی، بەپێی قسەی بەرپرسانی سایلۆكانی هەرێمی كوردستان، پێشبینی دەكرێت رۆژی سێشەم دەست بكرێت بە خەرجكردنی ئەو پارەیە بۆ جووتیاران.

رۆژی دووشەم 18ـی تشرینی دووەم، میران بەختیار بەڕێوەبەری سایلۆی هەولێر،  رایگەیاند، رۆژی شەموو چەكی بانكیمان وەرگرت و لە بانكی فیدراڵ تۆمارمان كرد.

زیاتر گوتی، بۆ وەرگرتنی 72 سەعات كاتمان پێویستە، ئەو رێكارە بانكییەش خەرجكردنی 158 ملیار دینارە و دەكەوێتە 20ـی مانگ كە رۆژی سەرژمێرییە، ناتوانین لەو رۆژەدا بەسەر جووتیاران دابەشی بكەین و دەكەوێتە پاش سەرژمێری.

روونی كردەوە، نازانرێت لە سەرەتای هەفتەی داهاتوو دەست بە دابەشكردنی دەكرێت یان لە ناوەڕاستی هەفتە، بەڵام ئێمە پێمان خۆشە چەند زووترە دەست بە دابەشكردنی بكرێت.

هاوكات نەوزاد شێخ كامیل بەڕێوەبەری گشتیی بازرگانی گوتی، لە پارەی گەنمی ئەمساڵ بڕی 130 ملیار دینار ماوە خەرج بكرێت، چاوەڕوانین لە ئایندەیەكی نزیكدا و پێش كۆتایی ساڵ بە گوژمەیەكی تر خەرج بكرێت.

ئەمساڵ حكوومەتی عێراق، بڕی 685 هەزار تۆن گەنمی لە جووتیارانی هەرێمی كوردستان وەرگرت، نرخی هەر تۆنێك لە گەنمی پلە یەك 835 هەزار دینار و گەنمی پلە دوو 815 هەزار دینار دیاری كرا، بە كۆی گشتی جووتیاران بە بەهای 565 ملیار دینار گەنمیان بە بەغدا فرۆشتووە.