لە ڕۆژئاوای كوردستان نەفیڕی سەرتاسەرى ڕاگەیەندرا

ئیدارەی خۆسەری سەر بە پارتی یەكێتیی دیموكرات (پەیەدە) لە ڕۆژئاوای كوردستان، نەفیڕ عامی راگەیاند و داوای لە هەموو خەڵک كرد کە بە هەر شێواز و رێگەیەک دەتوانن، دژی دوژمن شەڕ بکەن.
بە گوێرەی راگەیاندراوێكی ئیدارەی پەیەدە كە وێنەیەكی دەست (کوردستان پریس) كەوتووە، نەفیر عام راگەیاندراوە بۆ ڕووبەڕووبوونەوەی هێرشی میلیشیا چەكدارەكانی سووریا.
هەروەك ڕوون كراوەتەوە: "ئەو هێرشەی لە حەلەب و حەما دەستی پێكردووە، لە ناوچەیەكی دیاریكراو ناوەستێ، بەڵكوو هەڕەشە لە هەموو سووریا دەكات."
هاوكات داوا لە خەڵك كراوە، لە حاڵەتی ئامادەباشیی هەمیشەییدا بن و هێرشەكەشیان وا وەسف كردووە كە پرۆژەی خۆبەڕێوەبەریی (ئیدارەی پەیەدە)ی كردۆتە ئامانج و بەپێی بەیاننامەكە، ئەو هێرشە بۆ ئەوەیە زەویی نوێ بخرێتە سەر توركیا.
جێی باسە هەر ئەمڕۆ، هێزەكانی پەیەدا رایانگەیاند كە لە شەڕەكانیاندا لە شاری حەلەب و دەوروبەری و لە میانی پێكدادانیان لەگەڵ میلیشیا چەكدارەكانی سووریا، هەشت چەكداری پەیەدە گیانیان لەدەست داوە.