هەواڵێکی دڵخۆشکەر بۆ فەرمانبەران ڕاگەیاندرا

وەزارەتی شارەوانی و گەشتوگوزار ئامادەکاری بۆ دەستپێکردنی قۆناغی دووەمی دابەشکردنی زەوی دەکات، تاوەکو ئێستا  فۆڕمی 65 بۆ 70 هەزار  فەرمانبەر و خانەنشینی دیکە لە وەزارەتی شارەوانی وردبینییان بۆ کراوە، لەم قۆناغەدا تەنیا لە هەولێر و سلێمانی تیروپشک بۆ نزیکەی 40 هەزار پارچە زەوی دەکرێت.
 
 بەشێکی وەزارەتەکان فۆڕم و زانیاریی فەرمانبەرانیان ناردووەتە وەزارەتی شارەوانی و گەشتوگوزار، ئێستا پرۆسەی وردبینی بەردوامە، ئەم هەفتەیە لیستی ناوەکان ئاراستەی ئەنجوومەنی وەزیران دەکرێت و چاوەڕوان دەکرێت لە ماوەی دوو ڕۆژدا ڕەزامەندی بدات، دواتر ناوەکان دەگەڕێنرێنەوە شارەوانییەکان و بەگوێرەی زەوی ئامادەکراو تیروپشک بۆ ناوەکان دەکرێت.
 
سەربەست مەولوود، بەڕێوەبەری بەشی یاسایی لە وەزارەتی شارەوانی ڕایگەیاند  "بە ئەگەری زۆرەوە هەفتەی داهاتوو پرۆسەی تیروپشک بۆ دابەشکردنیان دەکرێت."
 
 بۆ یەکەمینجار لە هەردوو ئیدارەکانی سۆران و گەرمیان تیروپشک بۆ دابەشکردنی زەوی دەکرێت و زیاتر لە 10 هەزار پارچە زەوی دابەش دەکرێن.
 
بەگوێرەی بەدواداچوونی ئاڤا، ژمارەی ئەو کەسانەی کە لە هەر ناوچەیەک لەم قۆناغەدا سوودمەند دەبن، بەمشێوەیە دەبێت:-

هەولێر: 15 بۆ 20 هەزار فەرمانبەر.
سلێمانی: 10 بۆ 12 هەزار فەرمانبەر.
دهۆک: هەشت بۆ 10 هەزار فەرمانبەر.
سۆران: شەش بۆ هەشت هەزار فەرمانبەر. 
ئیدارەی گەرمیان: چوار بۆ شەش هەزار فەرمانبەر.