پەیامێک لە وەزارەتی دارایی لەبارەی مووچە هات

 وەزارەتی دارایی عێراق راگەیاندراوێكی بڵاو كردەوە و تێیدا دەست پێكردنی دابەشكردنی مووچەی مانگی یەكی مووچەخۆرانی سەر بە حكوومەتی فیدڕاڵی و هێزە ئەمنییەكانی عێراق و میلیشیاكانی راگەیاند.
ئەمە لە كاتێكدایە كە تاوەكوو ئێستا، وەزارەتی دارایی عێراق نە مووچەی مانگی 12ی ساڵی 2024 و نە مووچەی مانگی 1ی 2025ی مووچەخۆرانی هەرێمی كوردستانی نەناردووە و پاساوی جۆراوجۆریش بۆ نەناردنەكەی دەهێنێتەوە.
لەمبارەیەوە محەمەد زراری، بەڕێوەبەری گشتیی دیوانی چاودێریی دارایی هەرێمی كوردستان لە پرێس كۆنفرانسێكدا ئەمڕۆ یەكشەممە 19ی 1ی 2025 رای گەیاند: ”ئەو بابەتانەی بەغدا، تێبینین و تێبینیی هاوبەشن لە نێوان هەردوو دیوان، ئەو تێبینییانە هەر دەبن، لە رووی كاركردن و داهات و خەرجی، ئەوە شتێكی ئاساییە، وردبینی لە حكوومەتی عێراقیش بكەین تێبینی هەر دەبێ، بەڵام ئەوەی گرنگە ئەو تێبینییانە نابێ ببێتە هۆی ئەوەی مووچەی مووچەخۆرانی كوردستان بوەستێ.“
ئەمە لە كاتێكدایە كە بەپێی بڕیاری دادگای فیدڕاڵیی عێراق، نابێ حكوومەتی فیدڕاڵی لە ژێر هیچ پاساوێكدا مووچەی مووچەخۆرانی هەرێمی كوردستان دوابخات یان تێكەڵ بە ململانێی سیاسی بكات.