ئێران مەرجی کردنەوەی گەرووی هورمز راگەیاند

تا ئێستە دیار نییە ئاخۆ گەرووی هورمز كراوەتەوە یان داخراوە، ئەمەریكا دووپاتی تێپەڕبوونی رۆژانەی دەیان كەشتی هەڵگری نەوت بە گەرووەكە دەكاتەوە و ئێرانیش بە پێچەوانەوە، ئێستە هاوكات راپۆرتەكان باسی نزیكبوونەوەی شەڕ و دانوستانەكان دەكەن، لەوكاتەی بە هەوڵی ناوەندگیران، ئەگەری دەست پێكردنەوەی دانوستانەكان لە دۆحە هەیە.
ئەمڕۆ دووشەم عەباس عێراقچی وەزیری دەرەوەی ئێران دووپاتی كردەوە كە گفتوگۆكان لە رێگەی قەتەر و پاكستان بە شێوەیەكی چڕ بەردەوامە و ئاماژەی كرد كە مەرجەكانی ئێران روونن، قبووڵكردنیان لە لایەن ئەمەریكاوە دەبێتە هۆی كردنەوەی گەرووی هورمز و دەست پێكردنەوەی دانوستانەكان، وەك ئاژانسی "ئێرنا"ی ئێرانی گواستییەوە.  
هەر ئەمڕۆ ئیسماعیل بەقائی گوتەبێژ بە ناوی حكوومەتی ئێران رای گەیاند كە ئەگەری هەیە لە چەند رۆژی داهاتوو بگەن بە رێككەوتن، بنەمای چارەسەریی دیپلۆماسییەكەش بریتییە لە پێشنیازێكی حەوت خاڵی ئێران، گفتوگۆی لەسەر كراوە و دەكرێ لە ماوەی تەنیا دوو رۆژدا جێبەجێ بكرێت، ئێستە تۆپەكە لە یارگەی واشنتنە و ئاڵوگۆڕیی پەیام لە رێگەی ناوەندگیرەكانەوە هەیە و پێویستە ئەمەریكا بڕیار بدات، ئەگەرچی تا ئێستە واشنتن كار لەسەر شكستهێنان بە هەر هەوڵێكی دیپلۆماسی دەكات.