ئەمڕۆ پارەی ئەو کەسانە دابەشدەکرێت

بەرپرسی ئۆفیسی هەولێری كۆمسیۆنی باڵای هەڵبژاردنەكان ڕای دەگەیەنێت، 15 هەزار كارمەندمان لەسەر سندووقەكانی دەنگدان هەبووە و دەتوانن لە ئەمڕۆ سەردانی بانكەكان بكەن بۆ وەرگرتنی پاداشتەكانیان.  

مەریوان محەمەد بەرپرسی ئۆفیسی هەولێری كۆمسیۆنی باڵای هەڵبژاردنەكان، رای گەیاند، كارمەندانی سەر سندووقی دەنگدان لە ئەمڕۆ سەردانی بانكەكان بكەن بۆ وەرگرتنی پاداشتەكانیان.  

زیاتر گوتی، بەڕێوەبەری بنكەی دەنگدان 350 هەزار دینار وەردەگرێت، بەڕێوەبەری وێستگە و كارمەندانی تر 250 هەزار دینار وەردەگرن، ئەگەر دەرچووی كۆلێژ یان پەیمانگە یان ئامادەیی بن.

باسی لەوەش كرد، ئەوەی فەرمانبەری حكوومەت بێت 150 هەزار و سوپاس و پێزانینێكی ئەنجوومەنی وەزیران وەردەگرێت، هەورەها بەشێكیشمان هەیە یەدەگن، ئەوانیش ئەگەر دەرچووی ئامادەیی یان پەیمانگە یان زانكۆ بن، 100 هەزار دینار وەردەگرن، بەڵام ئەگەر فەرمانبەری حكوومەت بن 50 هەزار و سوپاس و پیزانینێك وەردەگرن.

ئەو بەرپرسەی كۆمسیۆن داوا لە هاووڵاتییان دەكات ئەوانەی تا ئێستە خۆیان تۆمار نەكردووە، سەردانی بنكەكانی تۆماركردن بكەن لە هەولێر كە 53 بنكەی تۆماركردنمان هەیە، ئەوانەشی خۆیان تۆمار كردووە و كارتەكانیان وەرنەگرتووەتەوە، دەتوانن سەردانی بنكەكان بكەن كارتەكانیان وەربگرنەوە.