وەزیری سامانە سروشتییەكانی حكوومەتی هەرێمی كوردستان رای گەیاند، بۆ هەناردەكردنەوەی نەوتی كوردستان ئامادەكاری كراوە، پێشبینی دەكەین لە كۆتایی مانگی سێ هەناردەكردنەوە دەست پێ بكات.
ئەمڕۆ دووشەم 17ـی شوبات، محەمەد كەمال ساڵح وەزیری سامانە سروشتییەكانی حكوومەتی هەرێمی كوردستان، لە كۆنگرەیەكی رۆژنامەوانیدا رای گەیاند، ئەمڕۆ شاندێكی وەزارەتی نەوتی عێراق دەگاتە هەولێر.
زیاتر گوتی، شاندەكە لەبارەی هەناردەكردنەوەی نەوتی كوردستان، لەگەڵیاندا كۆ دەبینەوە و باسی دواین پێشچوونەكان بۆ هەناردەكردنەوەی نەوت دەكەین.
باسی لەوەش كرد، لەتیف ڕەشید سەرۆك كۆماری عێراق هەمواری یاسای بودجەی عێراقی پەسند كردووە، بەمزووانە لە ڕۆژنامەی فەرمیی حكوومەتی فیدراڵی (وەقائیع) بڵاو دەكرێتەوە؛ هیچ بەربەستێك لە بەردەم هەناردەكردنەوەی نەوتەكە نەماوە و ئێمە لە ڕووی تەكنیكییەوە ئامادەین.
دەڵێت، بۆ هەناردەكردنەوەی نەوتی كوردستان، لایەنی سێیەمیش هەیە كە ئەویش توركیایە، دەبێت بۆ ئەم مەبەستە لەگەڵ ئەوانیش بگەینە ڕێككەوتن و گفتوگۆمان دەبێت.
بەگوتەی ئەو وەزیرە، پێشبینی دەكرێت تا كۆتایی مانگی سێ هەناردەكردنەوەی نەوتی كوردستان دەست پێ بكاتەوە.
وەڵام بدەوه