شەپۆلێکی بەفر و باران دەگاتە هەرێمی كوردستان

ئاراس جەبار، شارەزای كەشناسی، ڕایگەیاند: لە ئەنجامی کاریگەریی سەرەتایی بەرەیی پێشەوەی نزمەپاڵەپەستۆی جەمسەری باکوور، سبەی پێنجشەممە 20/2/2025 ئاسمانی ھەرێمی کوردستان بە درێژایی کاتەکان دەگۆڕێت بۆ ھەوری تەواو، لە کاتەکانی بەیانیەوە بارانبارین بە ڕێژەی ناوەند و بەردەوام لە ناوچەکانی پارێزگای دھۆک دەست پێدەکات و پاشان لە کاتەکانی دوای نیوەڕۆ بۆ ئێوارە بە شێوەی پچڕ پچڕ ناوچەکانی دیکەی ھەرێمی کوردستان دەگرێتەوە و لەشەودا ئاستی دابارینی بەفر و باران زیاتر دەبێت بۆ سەرجەم ناوچەکان و لە شوێنی جیاوازیشدا بارانی بەخوڕ و تەرزە دەبارێت، لەگەڵ ھەورەبرووسکە، بەفر لەم قۆناغەدا لە سەرجەم ناوچە شاخاوییەکانی بەرزیی 1000 مەتر لە ئاستی ڕووی دەریاوە دەبارێت، پلەی گەرمی بەراورد بە ئەمڕۆ 2 بۆ 4 پلە نزم دەبێتەوە، لە کاتەکانی دوانیوەڕۆدا، سبەی بای باشوور و باشووری رۆژھەڵات بە خێرایی 15-35کم لە کاتژمێرێکدا چالاک دەبێت و ئەگەری خۆڵبارینێکی کاتی و کەم دەبێت لە سنووری پارێزگای مووسڵ و رۆژئاوای پارێزگای ھەولێر.
ئاراس جەبار ڕایگەیاندووە: قۆناغی یەکەمی ئەم شەپۆلە کاتی بەیانی رۆژی ھەینی 21/2/2025 کۆتایی پێدێت و لەم قۆناغەدا بەفر ناوەندی پارێزگاکان ناگرێتەوە و سەرەتای ھەفتەی داھاتوو ھەوا ساردەکە بەتەواوی دەگات.