لەهەرێمی کوردستان پشووی فەرمی ڕاگەیەندرا

رۆژێكی ئەم هەفتەیە و رۆژێكی دیكەش لە هەفتەی داهاتوو لە هەرێمی كوردستان پشووی فەرمیین و وەزارەتی پەروەردەی حكوومەتی هەرێمی كوردستانیش ڕوونکردنەوە لەبارەی دەوام و تاقیکردنەوەکان دەدات.
بەپێی رۆژژمێری فەرمیی حكوومەتی هەرێمی كوردستان، لە دوو هەفتەدا دوو رۆژ پشووی فەرمیین، ڕۆژی چوارشەممە 9ی نیسان، بە بۆنەی رۆژی ڕووخانی ڕژێمی بەعس و ئازادکردنی عێراق پشووە، هەروەها رۆژی چوارشەممە 16ی نیسان، بە بۆنەی سەری ساڵی ئێزدییەکان (جەژنی سووری ئێزدییەکان) پشووی فەرمی دەبێت.
سەرچاوەیەکی ئاگادار لە ئەنجوومەنی وەزیرانی هەرێمی كوردستان، ڕایگەیاند: "لە مانگی چواردا تەنیا ئەم دوو رۆژە پشووە و چەند بۆنەیەكی دیكەش هەن، بەڵام ئەوان پشوو نین."
سەرچاوەکە جەختی کردەوە، بۆ پشووی فەرمی، دەبێت فەرمانبەران و هاووڵاتیان پشت بە ڕاگەیاندراوی فەرمی و ڕۆژژمێری فەرمیی حكوومەت ببەستن.
لای خۆیەوە سامان سیوەیلی، گوتەبێژی وەزارەتی پەروەردەی حکوومەتی هەرێمی کوردستان، ڕایگەیاند: "ئەو تاقیکردنەوانەی لەم دوو ڕۆژەی پشوودان، ڕاستەوخۆ تاقیکردنەوەکان دەکەونە ڕۆژی دوای پشوو، پشووەکە نابێتە هۆی فەوتانی هیچ تاقیکردنەوەیەک."
جەختی کردەوە، وەزارەتی پەروەردە پابەندی ئەو پشووە فەرمییانە دەبێت کە لە ڕۆژژمێری حکوومەتدا هەن.